واشنگٹن میں نیتن یاہو کی آمد پر احتجاج، مظاہرین نے گرفتاری کا مطالبہ کر دیا

اسرائیلی وزیراعظم بنیامین نیتن یاہو کی واشنگٹن ڈی سی آمد پر امریکہ میں شدید عوامی احتجاج دیکھنے میں آیا ہے، جہاں مظاہرین کی بڑی تعداد نے سڑکوں پر نکل کر ان کے خلاف شدید نعرے بازی کی اور انہیں “جنگی مجرم” قرار دیا۔ مظاہرین نے امریکی حکومت سے مطالبہ کیا کہ وہ فلسطینیوں کی نسل کشی اور جنگی جرائم میں ملوث ہونے کی پاداش میں نیتن یاہو کو فوری طور پر گرفتار کرے۔

احتجاج میں شریک افراد کا کہنا تھا کہ فلسطین میں بڑے پیمانے پر ہونے والی تباہی اور مبینہ نسل کشی کے ذمہ دار نیتن یاہو کو امریکی سر زمین پر ان کے استقبال کے بجائے قانون کا سامنا کرنا چاہیے۔ مظاہرین نے مؤقف اختیار کیا کہ عالمی عدالتِ انصاف اور عالمی فوجداری عدالت (دی ہیگ) میں نیتن یاہو کے خلاف جنگی جرائم پر گرفتاری کا وارنٹ جاری ہو چکا ہے، لہٰذا وہ ایک عالمی مجرم ہیں اور ان کا امریکہ سے کوئی تعلق یا خیرمقدم نہیں ہونا چاہیے۔

مظاہرین نے امریکی انتظامیہ پر زور دیا کہ وہ بین الاقوامی قوانین کا احترام کرتے ہوئے جاری شدہ وارنٹِ گرفتاری پر فوری عمل درآمد کرے اور نیتن یاہو کو پابندِ سلاسل کرے۔ مظاہرے کے دوران شدید نعرے بازی اور بینرز کے ذریعے غصے کا اظہار کیا گیا، جبکہ سیکیورٹی اہلکاروں نے واشنگٹن میں اہم سرکاری عمارتوں کے اطراف سیکیورٹی کے انتہائی سخت انتظامات کر رکھے تھے۔