ایکس کی بڑی پیشکش : صرف اسکرولنگ سے ہزاروں ڈالر کمائیں

سوشل میڈیا پلیٹ فارم ایکس (سابقہ ٹویٹر) پر محض وقت گزارنا اور ٹائم لائن اسکرول کرنا اب باقاعدہ آمدنی کا ذریعہ بن چکا ہے۔ ایلون مسک کے ایکس کو ایک مکمل ’ایوری تھنگ ایپ‘ بنانے کے وژن کے تحت کمپنی نے امریکا بھر میں اپنی نئی مالیاتی سروس ’ایکس منی‘ (X Money) باضابطہ طور پر متعارف کرا دی ہے۔ 28 جولائی سے یہ سہولت امریکا کے تمام پریمیم اور پریمیم پلس سبسکرائبرز کے لیے دستیاب کر دی گئی ہے، جس کے بعد صارفین کو بینکنگ اور مالیاتی خدمات کے لیے کسی دوسری ایپ پر جانے کی ضرورت نہیں رہے گی۔

ایکس منی کے تحت صارفین ایپ کے اندر ہی رقم جمع رکھنے، بغیر کسی فی کے رقم منتقل کرنے، بلوں کی ادائیگی، وائر ٹرانسفر اور فزیکل چیک بھیجنے جیسی خدمات حاصل کر سکتے ہیں۔ علاوہ ازیں، کمپنی نے صارفین کے لیے ایک ویزا ڈیبٹ کارڈ بھی متعارف کرایا ہے جسے عام بینک کارڈز کی طرح استعمال کیا جا سکے گا۔ صارفین کی رقوم کی حفاظت کے لیے کراس ریور بینک کے ساتھ شراکت داری کی گئی ہے، جہاں امریکی ادارے ایف ڈی آئی سی (FDIC) کے تحت 2 لاکھ 50 ہزار ڈالر تک کی ڈپازٹ انشورنس کا تحفظ فراہم کیا جائے گا۔ جبکہ ’کیش سوئپ پروگرام‘ کے تحت یہ تحفظ 1 کروڑ ڈالر تک بڑھایا جا سکتا ہے۔

مالیاتی فوائد کے حوالے سے کمپنی نے پریمیم پلس صارفین کے لیے اہل ڈپازٹس پر 6 فیصد سالانہ منافع (APY) کا اعلان کیا ہے، جو روایتی بینکوں کے سیونگ اکاؤنٹس اور معروف فن ٹیک کمپنیوں (جیسے وینمو اور کیش ایپ) کے مقابلے میں کہیں زیادہ ہے۔ اگرچہ یہ ہائی ییلڈ سہولت فی الحال صرف امریکہ تک محدود ہے اور دیگر ممالک میں اس کا آغاز بعد میں کیا جائے گا، تاہم اس اقدام سے ایکس نے فن ٹیک مارکیٹ میں ایک بڑا معاشی انقلاب برپا کر دیا ہے۔