حیدرآباد میں تیزگام ایکسپریس کی ایک بوگی پٹڑی سے اتر گئی، ٹریک متاثر

کراچی سے راولپنڈی جانے والی تیزگام ایکسپریس حیدرآباد کے علاقے حسین آباد کے قریب حادثے کا شکار ہو گئی، جہاں ٹرین کی 13ویں بوگی اچانک پٹڑی سے نیچے اتر گئی۔ حادثے کے بعد علاقے میں ہڑبونگ مچ گئی، تاہم ابتدائی اطلاعات کے مطابق کسی جانی نقصان یا شدید زخمی ہونے کی اطلاع موصول نہیں ہوئی ہے اور تمام مسافر محفوظ ہیں۔

ریلوے حکام کے مطابق حادثے کی اطلاع ملتے ہی ریسکیو اور بحالی کی ٹیمیں موقع پر پہنچ گئیں اور متاثرہ بوگی کو دوبارہ پٹڑی پر چڑھانے کا کام شروع کر دیا گیا۔ بوگی کے ڈی ریل (پٹڑی سے اترنے) ہونے کے باعث مین ٹریک کو نقصان پہنچا ہے، جس کی وجہ سے اپ ٹریک پر تمام ٹرینوں کی آمدورفت معطل کر دی گئی ہے اور کوٹری سے حیدرآباد جانے والی ٹرینوں کو بھی عارضی طور پر جگہ جگہ روک لیا گیا ہے۔

ریلوے ذرائع کا کہنا ہے کہ متاثرہ ٹریک کی مکمل مرمت اور بحالی کے کام میں کچھ گھنٹے درکار ہوں گے۔ انتظامیہ کی جانب سے بحالی کا کام ہنگامی بنیادوں پر تیزی سے جاری ہے تاکہ اپ اور ڈاؤن ٹریکس کو صاف کر کے ریلوے ٹریفک کو جلد از جلد معمول پر لایا جا سکے۔