حملہ ہوا تو دشمن کے فوجی اڈے اور اثاثے نشانہ بنیں گے، ایران کا واضح انتباہ

ایران نے خبردار کیا ہے کہ اگر اس کے خلاف کوئی فوجی جارحیت کی گئی تو وہ بھرپور اور فیصلہ کن جواب دے گا۔ اقوام متحدہ میں ایران کے مستقل مشن نے سیکرٹری جنرل انتونیو گوتریس کو خط ارسال کیا ہے جس میں کہا گیا ہے کہ امریکی صدر ڈونلڈ ٹرمپ کے حالیہ بیانات ممکنہ فوجی جارحیت کے حقیقی خطرے کی نشاندہی کرتے ہیں۔

خط میں مؤقف اختیار کیا گیا ہے کہ ایران جنگ یا کشیدگی میں اضافہ نہیں چاہتا، تاہم اگر اس پر حملہ کیا گیا تو وہ اپنے دفاع کا حق استعمال کرتے ہوئے سخت کارروائی کرے گا۔

ایرانی مشن نے واضح کیا کہ کسی بھی فوجی کارروائی کی صورت میں خطے میں موجود مخالف قوتوں کے فوجی اڈے، تنصیبات اور دیگر اثاثے جائز ہدف تصور کیے جائیں گے۔

خط میں امریکی صدر کے اس بیان کا حوالہ بھی دیا گیا جس میں انہوں نے کہا تھا کہ ایران کی جانب سے معاہدہ نہ ہونے کی صورت میں امریکا کو ڈیگو گارشیا اور رائل فضائیہ کے فیئر فورڈ ہوائی اڈے استعمال کرنا پڑ سکتے ہیں۔

ایران نے اقوام متحدہ سے مطالبہ کیا ہے کہ وہ صورتحال کا فوری نوٹس لے اور خطے میں کشیدگی کم کرنے کے لیے اپنا کردار ادا کرے۔