امریکی فوج کا آبنائے ہرمز کو بارودی سرنگوں سے صاف کرنے کا دعویٰ

امریکی سینٹرل کمانڈ (سینٹ کام) کے سربراہ ایڈمرل بریڈ کوپر نے آبنائے ہرمز کو بارودی سرنگوں سے پاک کرنے کا دعویٰ کرتے ہوئے کہا ہے کہ یہ اہم بحری گزرگاہ اب جہاز رانی کے لیے مکمل طور پر کھلی ہے۔ سینٹ کام کی آپریشنل اپڈیٹ ویڈیو میں انہوں نے بتایا کہ امریکی فوج نے 1500 سے زائد بحری جہازوں کو محفوظ گزرگاہ فراہم کی ہے، جس کے بعد یہاں آمد و رفت جنگ سے پہلے کی سطح کے قریب پہنچ چکی ہے۔ دوسری جانب ایرانی سپیکر باقر قالیباف نے امریکی دعوے پر ردِعمل دیتے ہوئے واضح کیا کہ آبنائے ہرمز صرف اسی صورت میں محفوظ رہ سکتی ہے جب وہاں امریکی افواج موجود نہ ہوں، اور خبردار کیا کہ یا تو تمام ممالک اپنا تیل فروخت کریں گے یا پھر کوئی بھی ملک تیل فروخت نہیں کر سکے گا۔