پمز میں چیف ٹیکنیشن کی بھرتی کا عمل روک دیا گیا

اسلام آباد کے سرکاری ہسپتال پاکستان انسٹی ٹیوٹ آف میڈیکل سائنسز (پمز) میں چیف ٹیکنیشن (بی ایس 16) کی بھرتی کا عمل فوری طور پر روک دیا گیا ہے۔ فیڈرل پبلک سروس کمیشن (ایف پی ایس سی) نے اس حوالے سے باقاعدہ پبلک نوٹس جاری کرتے ہوئے امیدواروں کو مطلع کیا ہے کہ وزارتِ قومی صحت نے بھرتی کے قواعد و ضوابط میں ترمیم کے باعث ایف پی ایس سی کو ارسال کی گئی ریکوزیشن واپس لے لی ہے۔ نوٹس کے مطابق چیف ٹیکنیشن کے موجودہ کیس پر اب مزید کوئی کارروائی نہیں کی جائے گی اور نئی بھرتی یا نظرثانی شدہ قواعد کے تحت عملدرآمد سے متعلق فی الحال کسی تاریخ کا تعین نہیں کیا گیا۔