پولیس ایپلیکیشنز سے عوام کی شکایات کم کرنے میں مدد ملے گی: سرفراز بگٹی

وزیراعلیٰ بلوچستان سرفراز بگٹی نے کہا ہے کہ جدید پولیس ایپلیکیشنز کے متعارف ہونے سے عوام کی شکایات اور خواتین کی ہراسگی جیسے واقعات میں نمایاں کمی آئے گی۔ کوئٹہ میں تقریب سے خطاب کرتے ہوئے انہوں نے اس احسن اقدام پر بلوچستان پولیس کو مبارکباد پیش کی اور بتایا کہ صوبے کے اے آئی (AI) سسٹم کو دیگر صوبوں کی جانب سے بھی بھرپور پذیرائی ملی ہے۔ انہوں نے کہا کہ بلوچستان حکومت خواتین کی تعلیم پر خصوصی توجہ دے رہی ہے اور سکالرشپ پروگرام کے ذریعے طالبات دنیا بھر کی معروف یونیورسٹیز میں تعلیم حاصل کر رہی ہیں۔ سرفراز بگٹی نے شہدا کی قربانیوں کو خراجِ عقیدت پیش کرتے ہوئے اعادہ کیا کہ شہدا کے لواحقین خود کو تنہا نہ سمجھیں، حکومت ہر قدم پر ان کے ساتھ کھڑی ہے۔