امریکہ عالمی حمایت کا جھوٹا تاثر پیدا کرنے کی کوشش کر رہا ہے، ایرانی مشن

اقوامِ متحدہ میں تعينات ایرانی مشن نے بحرین کی حمایت یافتہ اور امریکہ کی جانب سے پیش کردہ آبنائے ہرمز قرارداد کو سخت تنقید کا نشانہ بناتے ہوئے کہا ہے کہ واشنگٹن اس قرارداد کے شریک ممالک کی تعداد کو بڑھا چڑھا کر پیش کر رہا ہے تاکہ عالمی حمایت کا ایک جھوٹا تاثر پیدا کیا جا سکے۔ ایرانی مشن نے خبردار کیا ہے کہ اگر اس قرارداد کی وجہ سے خطے میں کشیدگی یا جنگی ماحول میں کوئی اضافہ ہوتا ہے، تو اس پر دستخط کرنے اور اس کی حمایت کرنے والے تمام ممالک بھی بین الاقوامی سطح پر اس کے نتائج کے برابر کے ذمہ دار سمجھے جائیں گے۔

بیان میں واضح کیا گیا ہے کہ خطے میں امریکی جارحیت اور مداخلت کو ممکن بنانے کے لیے دنیا میں کوئی بھی سیاسی جواز یا سفارتی تحفظ موجود نہیں ہے۔ واضح رہے کہ امریکہ، بحرین اور دیگر خلیجی ممالک کی جانب سے پیش کی جانے والی اس قرارداد کا بظاہر مقصد آبنائے ہرمز میں آزادانہ جہاز رانی کو یقینی بنانا اور خلیج میں ایران کی مبینہ عسکری کارروائیوں کا خاتمہ کرنا ہے، تاہم تہران اسے اپنے خلاف ایک سیاسی محاذ آرائی تصور کرتا ہے۔