آبنائے ہرمز کا تحفظ ایران کی قومی سلامتی کیلئے ناگزیر ہے: قالیباف کا دوٹوک مؤقف

ایران کی پارلیمنٹ کے اسپیکر محمد باقر قالیباف نے واضح الفاظ میں کہا ہے کہ آبنائے ہرمز سے متعلق اسٹریٹجک انتظامات کو برقرار رکھنا ایران کی بقا اور قومی سلامتی کے لیے ناگزیر ہے، جبکہ اس اہم آبی گزرگاہ سے تجارتی جہازوں کی محفوظ اور پرامن آمدورفت بھی تہران کے بنیادی مفادات کا حصہ ہے۔ ایرانی اسپیکر نے امریکا پر سخت تنقید کرتے ہوئے الزام عائد کیا کہ واشنگٹن مسلسل ایران کا اسلامی نظام تبدیل کرنے اور ملک کو تقسیم کرنے کی سازشوں میں مصروف ہے، تاہم ایرانی قوم کسی بھی بیرونی دباؤ اور دھمکی کے سامنے ہرگز سر تسلیم خم نہیں کرے گی۔

محمد باقر قالیباف نے دوٹوک مؤقف اختیار کرتے ہوئے کہا کہ ایران خطے میں کسی قسم کی جنگ کا خواہاں نہیں، لیکن اگر ملک پر کوئی بھی جارحیت مسلط کی گئی تو اس کا بھرپور، عبرت ناک اور فیصلہ کن جواب دیا جائے گا، جس کے لیے ایرانی مسلح افواج کو ہر طرح کے جوابی ایکشن کی مکمل آزادی حاصل ہے۔ انہوں نے واضح کیا کہ قومی مفادات کے تحفظ کے لیے طاقت کے ساتھ ساتھ سفارت کاری اور مذاکرات کے دروازے بھی کھلے رکھے جائیں گے، کیونکہ صرف جنگ یا محض مذاکرات پر تکیہ کرنا ایک بڑی اسٹریٹجک غلطی ہوگی۔ مفاہمتی یادداشتوں کے حوالے سے گفتگو کرتے ہوئے ان کا کہنا تھا کہ جس معاہدے کا ایران کو کوئی معاشی یا اسٹریٹجک فائدہ نہ پہنچے، اس کی پابندی جاری رکھنے کا کوئی جواز باقی نہیں رہتا اور دشمن جتنا بھی دباؤ ڈالے، ایران اپنی خود مختاری پر کوئی سمجھوتہ نہیں کرے گا۔