ایران نے روس سے ’وربا‘ ایئر ڈیفنس سسٹم کی خریداری کا معاہدہ کرلیا

ایران نے گزشتہ برس اسرائیل کے ساتھ ہونے والی فوجی کشیدگی کے دوران اپنے فضائی دفاعی نظام کو پہنچنے والے نقصان کے ازالے اور دفاع کو مزید مضبوط بنانے کے لیے روس کے ساتھ تقریباً 60 کروڑ ڈالر (500 ملین یورو) مالیت کا ایک بڑا اور خفیہ اسلحہ معاہدہ کر لیا ہے۔

برطانوی اخبار ’فنانشل ٹائمز‘ کی رپورٹ کے مطابق، یہ معاہدہ گزشتہ برس دسمبر میں ماسکو میں طے پایا تھا۔ اس کے تحت روس اگلے تین برسوں کے دوران ایران کو 500 جدید ’وربا‘ (Verba) لانچ یونٹس اور 2,500 ’نائن ایم 336‘ (9M336) میزائل فراہم کرے گا۔ یہ نظام کندھے پر رکھ کر فائر کیے جانے والے جدید ترین میزائلوں (MANPADS) پر مشتمل ہے، جو خاص طور پر کروز میزائلوں، ڈرونز اور کم بلندی پر اڑنے والے طیاروں کو نشانہ بنانے کی بھرپور صلاحیت رکھتے ہیں۔

رپورٹ میں بتایا گیا ہے کہ اس جدید دفاعی نظام کی ترسیل تین مراحل میں 2027ء سے 2029ء کے درمیان مکمل کی جائے گی۔ دفاعی ماہرین کا کہنا ہے کہ ’وربا‘ سسٹم اپنی انفراریڈ گائیڈڈ ٹیکنالوجی کی وجہ سے دشمن کے فضائی حملوں کو ناکام بنانے میں انتہائی موثر ثابت ہوتا ہے۔ ذرائع کا یہ بھی دعویٰ ہے کہ اس معاہدے کے کچھ حصے کے طور پر محدود تعداد میں سسٹمز پہلے ہی ایران پہنچ چکے ہیں تاکہ ہنگامی دفاعی ضروریات کو پورا کیا جا سکے