ایران منصفانہ معاہدے کیلئے تیار، امریکا قانون کا پابند رہے تو ڈیل ممکن ہے: ایرانی صدر

ایرانی صدر مسعود پزشکیان نے کہا ہے کہ ایران ایک متوازن اور منصفانہ معاہدے کے لیے مکمل طور پر تیار ہے، تاہم اگر امریکا بین الاقوامی قوانین کے دائرہ کار میں رہے تو کسی معاہدے کا حصول ناممکن نہیں۔

ایرانی میڈیا کے مطابق صدر مسعود پزشکیان اور روسی صدر ولادیمیر پوٹن کے درمیان ٹیلیفونک رابطہ اس وقت ہوا جب اسلام آباد میں ایران اور امریکا کے درمیان ہونے والے مذاکرات بغیر کسی حتمی نتیجے کے ختم ہوئے تھے۔ دونوں رہنماؤں نے خطے کی صورتحال، سیکیورٹی اور استحکام پر تفصیلی تبادلہ خیال کیا۔

ایرانی ایوان صدر کے مطابق گفتگو میں گزشتہ دو ہفتوں کی جنگ بندی سے متعلق پیش رفت کا بھی جائزہ لیا گیا۔ ایرانی صدر نے اس بات کا اعادہ کیا کہ ان کا ملک پائیدار امن اور سلامتی کی ضمانت دینے والے منصفانہ معاہدے کے لیے تیار ہے۔

انہوں نے کہا کہ اگر امریکا عالمی قوانین کی پاسداری کرے تو معاہدہ ممکن ہے۔ دوسری جانب روسی صدر ولادیمیر پوٹن نے مغربی ممالک کے دوہرے معیار پر تنقید کرتے ہوئے ایران کی خودمختاری اور علاقائی سالمیت کے احترام پر زور دیا۔

کریملن کے مطابق پوٹن نے تنازع کے سیاسی اور سفارتی حل میں مدد فراہم کرنے کی پیشکش کرتے ہوئے خطے میں پائیدار امن کے لیے ثالثی کے کردار پر آمادگی ظاہر کی۔

دونوں رہنماؤں نے دوطرفہ تعلقات کو مزید مضبوط بنانے کے عزم کا بھی اعادہ کیا۔