ہمت ہے تو آؤ دھرنا دو، پی ٹی آئی لانگ مارچ سے بھاگ گئی: عطا تارڑ

وفاقی وزیر اطلاعات و نشریات عطا تارڑ نے پاکستان تحریک انصاف (پی ٹی آئی) کے مجوزہ لانگ مارچ اور دھرنے پر شدید تنقید کا نشانہ بناتے ہوئے دوٹوک الفاظ میں کہا ہے کہ اگر ان میں ہمت ہے تو میدان میں آئیں اور دھرنا دے کر دکھائیں، کیونکہ حقیقت میں ان کی کوئی تیاری نہیں ہے اور وہ اب دھرنے سے بھی بھاگ چکے ہیں۔

وفاقی دارالحکومت میں میڈیا سے گفتگو کرتے ہوئے عطا تارڑ کا کہنا تھا کہ پی ٹی آئی کے رہنما اب لانگ مارچ سے بھی پیچھے ہٹ رہے ہیں۔ صوبہ خیبرپختونخوا کی صورتحال پر بات کرتے ہوئے انہوں نے کہا کہ وہاں امن و امان کی خراب صورتحال سب کے سامنے ہے جبکہ صوبائی حکومت زمینی حقائق اور حالات سے بالکل لاعلم بنی ہوئی ہے۔ انہوں نے الزام عائد کیا کہ خیبرپختونخوا میں تمام سیاسی جماعتوں پر حملے کیے گئے لیکن صوبائی حکومت نے آج تک دہشت گردی کے کسی ایک واقعے کی بھی مذمت نہیں کی۔

وزیراعلیٰ خیبرپختونخوا کو تنقید کا ہدف بناتے ہوئے وفاقی وزیر نے کہا کہ وہ ایک صوبائی چیف منسٹر کم اور کسی کالعدم جماعت کے کمانڈر زیادہ محسوس ہوتے ہیں، اور یہ کہ خیبرپختونخوا حکومت کھلے عام دہشت گردوں کی سہولت کاری میں ملوث ہے۔ انہوں نے مزید کہا کہ تحریک انصاف دراصل دہشت گردوں کی منظورِ نظر جماعت ہے جو کالعدم ٹی ٹی پی کی ‘بی ٹیم’ اور ٹی ٹی اے کی ‘سی ٹیم’ کا کردار ادا کر رہی ہے، اس لیے پی ٹی آئی ہوش کے ناخن لے۔ گفتگو کے آخر میں عطا تارڑ نے عزم ظاہر کیا کہ ریاست کی رٹ بحق رہے گی اور ایک دن ملک سے دہشت گردوں کا مکمل اور حتمی خاتمہ کر دیا جائے گا۔