میر رضا کے اہلخانہ کی سینئر پولیس افسران کو طلب کرنے کی درخواست مسترد

نوجوان تاجر میر رضا قتل کیس کی تحقیقات کرنے والے جوڈیشل کمیشن نے مقتول کے اہلخانہ کی جانب سے سینئر پولیس افسران کو کمیشن میں پیشی کے لیے طلب کرنے کی درخواست مسترد کر دی ہے۔ جوڈیشل کمیشن کے سربراہ جسٹس عمر سیال نے گزشتہ روز کی کارروائی کا باقاعدہ حکم نامہ جاری کرتے ہوئے واضح کیا کہ اہلخانہ نے ایڈیشنل آئی جی، ڈی آئی جی عامر فاروقی اور ڈی آئی جی فرخ لنجار کو ذاتی حیثیت میں طلب کرنے کی استدعا کی تھی۔ کمیشن نے اپنے حکم میں کہا ہے کہ سینئر پولیس افسران کو ذاتی طور پر نہیں بلایا جائے گا، تاہم مقتول کے اہلخانہ ان افسران کے حوالے سے اپنے سوالات 26 نومبر تک تحریری طور پر جمع کرا سکتے ہیں۔

سماعت کے دوران جوڈیشل کمیشن نے کیس کی شروعاتی تحقیقات پر شدید تحفظات اور برہمی کا اظہار کیا۔ جسٹس عمر سیال نے سیکرٹری ہیلتھ اور ڈی جی ہیلتھ پر سخت برہمی کا اظہار کرتے ہوئے کہا کہ انہوں نے غیر قانونی مداخلت کے ذریعے میر رضا قتل کیس میں میڈیکل بورڈ تشکیل دیا اور اس میں من مانی تبدیلیاں کیں۔ کمیشن نے قرار دیا کہ پہلی تحقیقاتی ٹیم کے سربراہ ایس ایس پی سمیع اللہ سومرو نے ابتدائی 6 دنوں میں کیس کو شدید نقصان پہنچایا؛ 52 کیمروں کی دستیاب فوٹیج میں سے صرف ایک لی گئی، کرائم سین کے گرد موجود جھاڑیاں جلا کر اہم شواہد ضائع کیے گئے اور بعد میں سارا ملبہ ماتحت عملے پر ڈال دیا گیا۔