ہماری پروازیں بند کی گئیں تو خطے میں کوئی جہاز نہیں اُڑنے دیں گے: ایران

ایران کے سپریم لیڈر کے مشیر محمد مخبر نے سخت تنبیہ جاری کرتے ہوئے کہا ہے کہ اگر ایران کو بین الاقوامی پروازوں اور ایئرپورٹ کی بنیادی سہولیات سے محروم کیا گیا، تو خطے کے دیگر ممالک بھی فضائی آپریشن کے لیے محفوظ نہیں رہیں گے۔ سوشل میڈیا پلیٹ فارم ’ایکس‘ پر اپنے بیان میں انہوں نے دوٹوک الفاظ میں کہا کہ خطے میں فضائی پروازیں یا تو سب کے لیے کھلی ہوں گی یا پھر کسی کے لیے بھی دستیاب نہیں ہوں گی۔

محمد مخبر نے واضح کیا کہ امریکا کے ساتھ مل کر ایران کے خلاف دشمنانہ پالیسیوں پر عمل کرنے والے ہمسایہ ممالک کے رویے کو ایرانی عوام کبھی فراموش نہیں کریں گے۔ ان کے مطابق، ایران کا مؤقف بالکل واضح ہے اور خطے میں فضائی سفر یا ایوی ایشن کے حوالے سے کسی بھی قسم کے امتیازی یا تعصب پر مبنی اقدام کو ہرگز برداشت نہیں کیا جائے گا۔

یہ بیان ایسے حساس وقت میں سامنے آیا ہے جب امریکی پابندیوں کے شدید دباؤ کے بعد خطے کے متعدد ممالک نے ایرانی ایئرلائنز کی پروازوں پر پابندیاں یا عارضی معطلی عائد کر دی ہے۔ حال ہی میں امریکی اقدامات کے تحت ایرانی ایوی ایشن سے منسلک اہم اداروں اور 27 ایئرلائنز کو نئی پابندیوں کی زد میں لایا گیا ہے۔

اسی سلسلے کی ایک کڑی کے طور پر عراق کے نجف انٹرنیشنل ایئرپورٹ نے بھی 25 ستمبر کی شب سے ایران آنے اور جانے والی تمام پروازیں غیر معینہ مدت کے لیے معطل کر دی ہیں۔ ایئرپورٹ انتظامیہ کا کہنا ہے کہ یہ فیصلہ متعلقہ اعلیٰ حکام کی سرکاری ہدایات کی روشنی میں کیا گیا ہے، اور پروازوں کی بحالی کے بارے میں نئی احکامات ملنے پر ہی ایئرلائنز کو آگاہ کیا جائے گا۔ قبل ازیں بغداد ایئرپورٹ پر بھی ایرانی پروازیں معطل ہونے پر تہران نے پروازیں نجف منتقل کرنے پر غور کیا تھا، لیکن اب نجف سے بھی فضائی رابطہ منقطع ہو چکا ہے۔ ان تمام پابندیوں کے نتیجے میں ایران کے متعدد بین الاقوامی روٹس شدید متاثر ہوئے ہیں، تاہم ترکی، چین اور کچھ دیگرمخصوص ممالک کے لیے محدود پروازیں تاحال جاری رہنے کی اطلاعات ہیں۔