کابینہ کمیٹی برائے امن و امان کا اجلاس، 4 جے آئی ٹیز اور 21 کیسز کے جیل ٹرائلز کی منظوری

محکمہ داخلہ پنجاب میں کابینہ کمیٹی برائے امن و امان کا 60 واں اجلاس منعقد ہوا، جس میں صوبے بھر کی مجموعی سکیورٹی صورتحال کا تفصیلی جائزہ لیا گیا۔ اجلاس کے دوران اہم نوعیت کے فیصلوں کی منظوری دیتے ہوئے 4 جوائنٹ انویسٹی گیشن ٹیموں (JITs) کی تشکیل اور 21 مقدمات کے جیل ٹرائل کی منظوری دے دی گئی۔

اجلاس کی صدارت صوبائی وزیر و چیئرمین کابینہ کمیٹی خواجہ سلمان رفیق اور کو چیئرمین بلال یاسین نے مشترکہ طور پر کی، جبکہ صوبائی وزیر سید عاشق حسین کرمانی اور معاون خصوصی وزیراعلیٰ پنجاب رانا بلال احمد نے بھی خصوصی شرکت کی۔ اس کے علاوہ سیکرٹری داخلہ پنجاب ڈاکٹر احمد جاوید قاضی، ایڈیشنل آئی جی محمد علی نیکوکارہ، سپیشل سیکرٹری داخلہ فیصل فرید، کمشنر لاہور، ڈی آئی جی سپیشل برانچ و سی ٹی ڈی اور دیگر اعلیٰ حکام شریک ہوئے جبکہ صوبہ بھر کے کمشنرز اور آر پی اوز نے ویڈیو لنک کے ذریعے بریفنگ دی۔

سیکرٹری داخلہ ڈاکٹر احمد جاوید قاضی نے بریفنگ دیتے ہوئے بتایا کہ پنجاب بھر میں 5 اکتوبر تک دفعہ 144 نافذ العمل ہے، جس کے تحت عوامی مقامات پر پانچ یا اس سے زائد افراد کے اجتماع، جلوس نکالنے، لوگوں کو اکسانے اور ہر قسم کے ہتھیاروں کی نمائش یا لے جانے پر مکمل پابندی عائد ہے۔

صوبائی وزیر خواجہ سلمان رفیق نے اس عزم کا اعادہ کیا کہ وزیراعلیٰ پنجاب کی ہدایات کے مطابق امن عامہ کو برقرار رکھا جائے گا اور سوشل میڈیا پر کسی بھی قسم کی سیاسی و مذہبی انتہا پسندی کی ہرگز اجازت نہیں دی جائے گی۔ کو چیئرمین بلال یاسین اور دیگر رہنماؤں نے واضح کیا کہ عوام کے جان و مال اور املاک کا تحفظ حکومتِ پنجاب کی اولین ترجیح ہے، اور امن میں رخنہ ڈالنے یا عوام کی زندگیوں کو خطرے میں ڈالنے والوں سے آہنی ہاتھوں سے نمٹا جائے گا۔