ایرانی پاسداران انقلاب کا آبنائے ہرمز میں امریکی بحری جہازوں کی پسپائی کا دعویٰ

ایرانی پاسدارانِ انقلاب (IRGC) کے ترجمان حسین محبی نے دعویٰ کیا ہے کہ ایرانی عسکری دباؤ اور طاقت کے خوف سے امریکی بحری جہاز آبنائے ہرمز سے 400 کلومیٹر دور منتقل ہونے پر مجبور ہو گئے ہیں، جسے انہوں نے ایرانی مسلح افواج کی ایک بڑی کامیابی قرار دیا ہے۔ ان کا کہنا ہے کہ واشنگٹن آبنائے ہرمز میں اپنے تزویراتی مقاصد حاصل کرنے میں مکمل طور پر ناکام رہا ہے، تاہم ایران کی جانب سے اعلان کردہ تمام 7 شرائط پوری ہونے تک امریکا کے ساتھ یہ محاذ آرائی اسی طرح جاری رہے گی۔

ترجمان پاسدارانِ انقلاب نے سخت انتباہ جاری کرتے ہوئے کہا کہ اگر مستقبل میں دوبارہ ایران پر کوئی فوجی حملہ کیا گیا تو تہران اس جنگ کا جغرافیائی دائرہ کار یکسر تبدیل کر دے گا، اور پہلے سے زیادہ مؤثر اور جدید ہتھیاروں سے دشمن کے متعدد نئے اہداف کو نشانہ بنایا جائے گا۔ انہوں نے یہ دعویٰ بھی کیا کہ ایران کے پاس ایسی تباہ کن عسکری صلاحیتیں اور ہتھیار موجود ہیں جنہیں اب تک میدانِ جنگ میں استعمال نہیں کیا گیا، اور تہران اپنے مخالفین کی جانب سے نشانہ بنائے گئے اہداف کے مقابلے میں کئی گنا زیادہ اہداف کو ملیا میٹ کرنے کی سکت رکھتا ہے۔

حسین محبی کے مطابق، حالیہ ایرانی جوابی حملوں کے نتیجے میں خطے میں موجود امریکی فوجی اور انٹیلی جنس تنصیبات کو شدید نوعیت کا نقصان پہنچا ہے۔ انہوں نے اس بات کی بھی وضاحت کی کہ ایران کے عسکری اہداف کبھی بھی اس کے ہمسایہ برادر ممالک نہیں رہے، بلکہ ان کارروائیوں کا مرکز صرف اور صرف خطے میں موجود امریکی عسکری پوزیشنز تھیں۔