فیول سکیم پر عملدرآمد کیلئے متعلقہ اداروں میں مؤثر رابطہ جاری ہے: بلال اظہر کیانی

وفاقی دارالحکومت سے جاری اپنے ایک اہم بیان میں وزیر مملکت برائے خزانہ بلال اظہر کیانی نے کہا ہے کہ حکومت کا بنیادی مقصد فیول ریلیف اسکیم کے فوائد کو براہ راست نچلی سطح پر حقدار اور مستحق شہریوں تک پہنچانا ہے، جس کے لیے اس اسکیم کے تحت انتہائی شفاف طریقے سے مستحق افراد کی نشاندہی کا عمل جاری ہے۔ انہوں نے اس بات پر زور دیا کہ حکومت عوامی ریلیف کے ان تمام اقدامات کو جدید ڈیجیٹل نظام سے منسلک کر رہی ہے تاکہ شفافیت کو یقینی بنایا جا سکے، اور اس ضمن میں تمام متعلقہ اداروں کے درمیان مؤثر اور مربوط رابطہ کار بھی جاری ہے۔

ملکی سیاسی صورتحال اور سکیورٹی کے امور پر بات کرتے ہوئے بلال اظہر کیانی نے دوٹوک الفاظ میں کہا کہ ریاست کسی کو بھی ملک کا امن و امان تباہ کرنے کی ہرگز اجازت نہیں دے گی، اور اسلام آباد کو یرغمال بنانے کی ہر ناپاک کوشش کو سختی سے ناکام بنایا جائے گا۔ انہوں نے واضح کیا کہ عامتہ الناس کے جان و مال کے تحفظ کے لیے حکومت ہر ممکن اقدام اٹھائے گی، اور یہ امید کی جاتی ہے کہ آئندہ کوئی بھی عناصر اس قسم کی کوشش یا اقدام نہیں کریں گے۔

وزیر مملکت نے یقین دہانی کرائی کہ اس وقت اسلام آباد اور راولپنڈی کے تمام راستے، شاہراہیں اور تجارتی مراکز مکمل طور پر کھلے اور معمول کے مطابق بحال ہیں۔ انہوں نے عزم ظاہر کیا کہ عوام کو ہر فتنے اور انتشار سے بچانے کی بھرپور کوشش کی جائے گی، کیونکہ دارالحکومت پر حملہ آور ہونے والوں کو قانون کے مطابق روکنا ریاست کی اولین اور بنیادی ذمہ داری ہے۔