فیلڈ مارشل عاصم منیر سے عباس عراقچی کا رابطہ، امریکی حملے معاہدوں کی خلاف ورزی قرار

ایران کے وزیر خارجہ عباس عراقچی نے فیلڈ مارشل سید عاصم منیر سے اہم ٹیلیفونک رابطہ کیا ہے، جس کے دوران انہوں نے خطے میں حالیہ امریکی حملوں کی شدید الفاظ میں مذمت کرتے ہوئے انہیں اقوامِ متحدہ کے چارٹر اور اسلام آباد مفاہمتی یادداشت کی صریح خلاف ورزی قرار دیا ہے۔ ایرانی خبر رساں ایجنسی کے مطابق، عباس عراقچی نے گفتگو کے دوران واضح کیا کہ ایران کسی بھی قسم کی امریکی جارحیت کے خلاف مضبوطی سے کھڑا رہے گا اور اپنی خودمختاری، علاقائی سالمیت اور قومی سلامتی کے تحفظ کو یقینی بنانے کے لیے ہر ممکن اور ضروری دفاعی اقدام اٹھائے گا۔

ایرانی وزیر خارجہ نے واشنگٹن کی پالیسیوں پر کڑی تنقید کرتے ہوئے کہا کہ اگر امریکی حکام اسلام آباد میمورنڈم آف انڈرسٹینڈنگ کی پاسداری کرنے میں ناکام رہتے ہیں، تو یہ اس بات کا واضح ثبوت ہوگا کہ واشنگٹن خطے میں محاذ آرائی اور جنگی پالیسیوں کے تسلسل پر قائم ہے۔ انہوں نے دوٹوک الفاظ میں خبردار کیا کہ اگر امریکہ کی جانب سے مزید کوئی فوجی کارروائی کی گئی تو ایران اپنی خودمختاری اور علاقائی سالمیت کے دفاع سے کسی صورت پیچھے نہیں ہٹے گا اور دشمن کو اس کی حد میں رکھنے کے لیے ہر ممکن جواب دینے کا پورا حق محفوظ رکھتا ہے۔