ٹرمپ انتظامیہ نے مفاہمت کی پہلی شق پر عمل کرنے میں ناکامی کا مظاہرہ کیا، ابراہیم عزیزی

تہران: ایرانی پارلیمنٹ کی قومی سلامتی کمیٹی کے سربراہ ابراہیم عزیزی نے امریکہ کو معاہدے کی شرائط پر عمل درآمد کے حوالے سے سخت الفاظ میں متنبہ کیا ہے۔ سوشل میڈیا پلیٹ فارم ‘ایکس’ (سابقہ ٹوئٹر) پر جاری اپنے ایک بیان میں ابراہیم عزیزی نے کہا کہ ٹرمپ انتظامیہ ایران کے ساتھ طے پانے والی مفاہمتی یادداشت کی پہلی ہی شق پر عمل کرنے میں ناکام رہی ہے۔ انہوں نے واضح کیا کہ اس شق کے تحت دونوں فریقین نے تمام محاذوں، بشمول لبنان میں فوری اور مستقل فوجی کارروائیوں کے خاتمے پر اتفاق کیا تھا۔

ابراہیم عزیزی نے مزید کہا کہ امریکہ کی جانب سے اس بنیادی شق پر عمل نہ کرنا اس بات کا ثبوت ہے کہ وہ ایرانی عوام کا اعتماد حاصل کرنے کے لیے بالکل سنجیدہ نہیں ہے۔ انہوں نے سخت لہجے میں خبردار کیا کہ اگر یہ صورتحال اسی طرح جاری رہی تو اس کے سنگین نتائج برآمد ہوں گے، جن میں معاہدے کی خلاف ورزیوں پر ایران کی طرف سے ایک سمجھدار اور دفاعی ردعمل بھی شامل ہو سکتا ہے۔