27 اگست سے مون سون بارشوں کے نئے سلسلے کی پیشگوئی

اسلام آباد: محکمہ موسمیات (PMD) نے پیشگوئی کی ہے کہ اسلام آباد سمیت ملک کے مختلف علاقوں میں 27 اگست سے گرج چمک اور تیز ہواؤں کے ساتھ بارش کا نیا سلسلہ شروع ہونے کا امکان ہے۔

محکمہ موسمیات کے مطابق، وفاقی دارالحکومت اسلام آباد میں آئندہ ایک سے دو روز کے دوران موسم گرم اور مرطوب رہے گا جہاں درجہ حرارت 36 ڈگری سینٹی گریڈ تک جا سکتا ہے، تاہم 27 اگست سے ہوا کے کم دباؤ کے باعث تیز ہواؤں اور بارش کی توقع ہے۔

دوسری جانب، صوبائی دارالحکومت لاہور سمیت پنجاب کے بیشتر علاقوں میں شدید گرمی اور حبس کی کیفیت برقرار رہے گی، جہاں لاہور کا زیادہ سے زیادہ درجہ حرارت 37 ڈگری سینٹی گریڈ رہنے کا امکان ہے۔ کراچی میں بھی سمندری ہواؤں کی رفتار کم ہونے اور ہوا میں نمی کا تناسب 75 فیصد تک پہنچنے کی وجہ سے حبس کی شدت زیادہ محسوس کی جا رہی ہے۔ کراچی میں آج زیادہ سے زیادہ درجہ حرارت 33 ڈگری سینٹی گریڈ ریکارڈ کیا گیا۔

خیبرپختونخوا کے بعض بالائی اضلاع جیسے سوات، دیر، مانسہرہ، ایبٹ آباد، کوہستان اور جنوبی وزیرستان میں چند مقامات پر بارش کی توقع ہے جبکہ پشاور میں پارہ 37 ڈگری سینٹی گریڈ تک پہنچ سکتا ہے۔ محکمہ موسمیات نے شہریوں کو بارش اور گرج چمک کے دوران غیر ضروری سفر سے گریز کرنے کی ہدایت کی ہے۔