عمران خان کا علاج: جمائما کی جانب سے برطانوی وزیراعظم اور وزیر خارجہ سے مداخلت کی درخواست

اسلام آباد: سابق وزیراعظم اور پاکستان تحریک انصاف کے بانی عمران خان کی سابقہ اہلیہ جمائما گولڈ سمتھ نے برطانوی وزیراعظم اینڈی برنہم اور سیکرٹری خارجہ ایڈ ملی بینڈ سے مطالبہ کیا ہے کہ وہ بانی پی ٹی آئی کے ساتھ روا رکھے جانے والے سلوک پر اپنی خاموشی توڑیں اور اسے انسانی حقوق کی شدید خلاف ورزی قرار دیں۔

سوشل میڈیا پلیٹ فارم ایکس (سابقہ ٹوئٹر) پر جاری ایک بیان میں جمائما گولڈ سمتھ نے کہا کہ ان کے بچوں کے والد پچھلے تین سال سے سیاسی انتقام اور یکسوئی پر مبنی کارروائیوں کا نشانہ بنے ہوئے ہیں۔ انہوں نے الزام عائد کیا کہ عسکری حکام کی جانب سے ان کے ساتھ جو سلوک کیا جا رہا ہے، اقوام متحدہ کی تعریف کے مطابق وہ شدید اذیت کے زمرے میں آتا ہے جس سے ان کی جسمانی اور ذہنی صحت کو خطرات لاحق ہیں۔

جمائما کا کہنا تھا کہ اقوام متحدہ کے ‘نیلسن منڈیلا رولز’ کے تحت کسی بھی شخص کو 15 دن سے زیادہ قیدِ تنہائی میں رکھنا غیر قانونی ہے، جبکہ بانی پی ٹی آئی کو تین سال سے اس صورتحال کا سامنا ہے۔ انہوں نے کہا کہ سپریم کورٹ آف پاکستان کے واضح احکامات کے باوجود انہیں ذاتی معالج تک رسائی، خاندانی ملاقاتوں اور اپنے بیٹوں کے ساتھ فون پر بات چیت کی اجازت نہیں دی جا رہی۔

انہوں نے برطانوی حکومت سے مطالبہ کیا کہ وہ پاکستانی حکام پر زور دے کہ سپریم کورٹ کے احکامات پر عملدرآمد کیا جائے، بانی پی ٹی آئی کو طبی سہولیات فراہم کی جائیں اور قیدِ تنہائی کا خاتمہ کر کے ان کے بنیادی انسانی حقوق کا تحفظ یقینی بنایا جائے۔