بانی پی ٹی آئی کی رہائی عدالتوں کے ذریعے ہی ہوگی، ججز کے فیصلوں سے امید پیدا ہوئی: علیمہ خان

راولپنڈی: بانی پی ٹی آئی عمران خان کی ہمشیرہ علیمہ خان نے کہا ہے کہ عدالتوں سے ہی بانی پی ٹی آئی کو ریلیف اور رہائی ملنی ہے، اور ججز کے حالیہ اقدامات و باتوں سے عوام میں عدلیہ کے بارے میں امید کی نئی کرن پیدا ہوئی ہے۔

اڈیالہ جیل گورکھپور فیکٹری ناکے پر میڈیا سے گفتگو کرتے ہوئے علیمہ خان نے کہا کہ ججز نے جو ملاحظات دیے ہیں وہ مکمل طور پر آئین اور قانون کے مطابق ہیں۔ انہوں نے زور دیا کہ عدالتیں انصاف کی ضامن ہیں اور ہر پاکستانی کا ان سے امید رکھنا بجا ہے۔ ان کا کہنا تھا کہ سپریم کورٹ کے فیصلوں کو تسلیم نہ کرنا قابلِ تشویش ہے، اور اگر حکومت عدالتوں کے احکامات کو نہیں مانتی تو یہ آئینی نظام پر بڑا سوال ہے۔

علیمہ خان نے شہریوں سے اپیل کی کہ جو ججز اور عدالتیں انصاف کی فراہمی کے لیے کوششیں کر رہی ہیں، تمام قوم کو ان کے ساتھ کھڑا ہونا چاہیے کیونکہ توہینِ عدالت ایک انتہائی سنگین معاملہ ہے۔

دوسری جانب، جیل ذرائع کے مطابق بانی پی ٹی آئی کی ایک اور ہمشیرہ نورین نیازی کی عمران خان سے ملاقات ختم ہو گئی ہے۔ یہ ملاقات اڈیالہ جیل کے کانفرنس روم میں تقریباً 40 منٹ تک جاری رہی۔ ملاقات کے بعد نورین نیازی گورکھپور فیکٹری ناکے پر پہنچیں جہاں انہوں نے میڈیا سے بات چیت کیے بغیر علیمہ خان سے تفصیلی مشاورت کی۔