جوا پروموشن کیس: یوٹیوبر اقراء کنول اور شوہر کی عبوری ضمانت ملتوی

لاہور کی سیشن کورٹ میں یوٹیوبر اقرء کنول اور ان کے شوہر اریب کے خلاف آن لائن جوا ایپ کی تشہیر کے مقدمے میں عبوری ضمانتوں پر سماعت ہوئی۔ ایڈیشنل سیشن جج ذوالفقار احمد نعیم نے کیس کی سماعت کی، جس کے دوران دونوں ملزمان نے عدالت میں پیش ہو کر اپنی حاضری مکمل کروائی۔

سماعت کے دوران ملزمان کے وکیل ایڈووکیٹ چوہدری سلیم نے دلائل دیے، جس کے بعد عدالت نے نیشنل سائبر کرائم انویسٹیگیشن ایجنسی (NCCIA) کو حکم دیا کہ وہ آئندہ سماعت پر مقدمے کا مکمل ریکارڈ پیش کرے۔ عدالت نے فریقین کے دلائل اور ریکارڈ کی طلبی کے بعد سماعت 14 مئی تک ملتوی کر دی ہے۔

واضح رہے کہ نیشنل سائبر کرائم انویسٹیگیشن ایجنسی نے اقرء کنول اور ان کے شوہر کے خلاف غیر قانونی آن لائن جوئے کی ایپلی کیشنز کو فروغ دینے کے الزام میں مقدمہ درج کر رکھا ہے، جس میں گرفتاری سے بچنے کے لیے ملزمان نے عدالت سے رجوع کر رکھا ہے۔