میٹا کا انسٹاگرام کے لیے اہم فیچر پر کام جاری

کیلیفورنیا: میٹا نے انسٹاگرام صارفین کے لیے ایک نئی پے وال (Paywall) سروس پر کام شروع کر دیا ہے جس کا نام انسٹاگرام پلس رکھا گیا ہے۔ اس سروس کا سب سے بڑا اور پرکشش فیچر گمنام طریقے سے اسٹوریز دیکھنا (Anonymous Story Viewing) ہے، جس کے بعد صارفین کسی کی بھی اسٹوری دیکھ سکیں گے اور دوسرے شخص کو اس کا علم نہیں ہوگا۔

ابتدائی طور پر یہ سروس تجرباتی بنیادوں پر میکسیکو، جاپان اور فلپائنز کے صارفین کے لیے پیش کی جا رہی ہے، جس کی ماہانہ فیس تقریباً 1 سے 2 ڈالر (مقامی کرنسی کے مطابق) مقرر کی گئی ہے۔

انسٹاگرام پلس کے دیگر اہم فیچرز میں درج ذیل شامل ہیں:

اسٹوری ری ویزٹ ٹریکر: صارفین یہ دیکھ سکیں گے کہ ان کی اسٹوری کو کس نے ایک سے زیادہ بار دیکھا ہے۔

سپر لائک ری ایکشن: اسٹوریز کے لیے ایک نیا اینیمیٹڈ ’سپر لائک‘ بٹن متعارف کرایا جائے گا۔

توسیعی رسائی: صارفین اپنی اسٹوریز کو 24 گھنٹے سے زیادہ وقت کے لیے بھی نمایاں رکھ سکیں گے تاکہ زیادہ سے زیادہ لوگ انہیں دیکھ سکیں۔

میٹا، جو فیس بک اور واٹس ایپ کی بھی مالک ہے، اپنی آمدنی بڑھانے کے لیے دیگر ایپس پر بھی اسی طرح کے پریمیم فیچرز کی آزمائش کر رہا ہے۔ ماہرین کا ماننا ہے کہ یہ اقدام اسنیپ چیٹ پلس (Snapchat+) کی کامیابی کے جواب میں اٹھایا گیا ہے۔