پاکستان سمیت کئی ممالک میں انسٹاگرام ڈاؤن

پاکستان سمیت دنیا کے مختلف ممالک میں سوشل میڈیا پلیٹ فارم Instagram کی سروس متاثر ہونے سے صارفین کو مشکلات کا سامنا کرنا پڑ رہا ہے۔

متعدد صارفین نے شکایت کی ہے کہ انہیں میسیجز بھیجنے اور وصول کرنے میں دشواری پیش آ رہی ہے، جبکہ کچھ افراد کو فیڈ لوڈ ہونے اور ایپ تک رسائی میں بھی مسائل درپیش ہیں۔

ڈیجیٹل سروسز میں خرابیوں کی نگرانی کرنے والی ویب سائٹ Downdetector کے مطابق پاکستان میں صبح تقریباً 7 بج کر 10 منٹ پر انسٹاگرام کی ایپ اور ویب سائٹ میں تکنیکی خلل کی رپورٹس سامنے آنا شروع ہوئیں، جس کے بعد مختصر وقت میں ہزاروں صارفین نے مسئلے کی نشاندہی کی۔

رپورٹس کے مطابق اس حوالے سے ڈاؤن ڈیٹیکٹر پر 13 ہزار سے زائد شکایات درج کی گئیں۔ ان میں سے تقریباً 71 فیصد شکایات ایپ کے درست کام نہ کرنے سے متعلق تھیں جبکہ قریب 20 فیصد صارفین نے سرور کنکشن کے مسائل کی نشاندہی کی۔

اطلاعات کے مطابق یہ خرابی خاص طور پر براہِ راست میسیجنگ (Direct Messaging) سروس کو متاثر کر رہی ہے جس کے باعث صارفین کو ذاتی پیغامات بھیجنے اور وصول کرنے میں مشکلات پیش آ رہی ہیں۔ امریکا سمیت دیگر کئی ممالک میں بھی ہزاروں صارفین اسی نوعیت کے مسائل کی شکایت کر رہے ہیں۔