انسٹاگرام کا نیا اے آئی ٹول پر کام جاری

کیلیفورنیا: میٹا کی ملکیت فوٹو شیئرنگ ایپ انسٹاگرام اپنے پلیٹ فارم پر مصنوعی ذہانت (AI) کے استعمال کو بڑھاتے ہوئے ایک ایسا نیا ٹول تیار کر رہا ہے جو صارفین کی اسٹوریز کو بالکل نیا روپ دے دے گا۔ اس نئے فیچر کا نام ‘اے آئی ٹرانزیشن’ (AI Transition) رکھا گیا ہے، جو اسٹوریز میں پوسٹ کی جانے والی ساکن تصاویر کے درمیان ایسی ہموار ٹرانزیشن پیدا کرے گا کہ ایک سادہ سا سلائیڈ شو متحرک ویڈیو کی طرح نظر آئے گا۔

اس فیچر کی پہلی بار نشاندہی معروف ریورس انجینئر الیسانڈرو پیلوزی نے کی ہے، جس کی اب دیگر ذرائع سے بھی تصدیق ہو رہی ہے۔ موجودہ سسٹم میں جب صارفین ایک سے زیادہ تصاویر اپ لوڈ کرتے ہیں تو وہ ایک عام ‘سلائیڈ ٹو سلائیڈ’ ترتیب میں نظر آتی ہیں، لیکن نیا اے آئی فیچر دو تصاویر کے درمیان موجود خلا کو خودکار طریقے سے پُر کر کے انہیں ایک دوسرے میں ضم (Merge) کر دے گا، جس سے تصویر بدلتے وقت جھٹکا محسوس نہیں ہوگا۔

انسٹاگرام انتظامیہ کے مطابق، یہ فیچر موجودہ ‘سیپریٹ’ (Separate) موڈ کے ساتھ ایک آپشن کے طور پر دستیاب ہوگا۔ یہ پیش رفت انسٹاگرام کی اس مہم کا حصہ ہے جس کے تحت وہ اپنے پلیٹ فارم کو ٹک ٹاک اور دیگر ویڈیو ایپس کے مقابلے میں زیادہ تخلیقی اور مصنوعی ذہانت سے لیس بنانا چاہتا ہے۔