فائیو جی سپیکٹرم کی نیلامی کیلئے انفراسٹرکچر مکمل نہ ہوسکا

فائیو جی اسپیکٹرم کی نیلامی کے حوالے سے اہم انکشاف سامنے آیا ہے کہ ملک میں اس کے لیے درکار بنیادی انفراسٹرکچر تاحال مکمل نہیں ہو سکا۔

وزارتِ انفارمیشن کے اعلامیے کے مطابق اس سلسلے میں لاپروائی برتنے پر پیڈا ایکٹ کے تحت ذمہ دار ملازمین کو معطل کر دیا گیا ہے، تاہم حکومت کا مؤقف ہے کہ آئندہ ایک سے دو ماہ میں فائیو جی اسپیکٹرم کی نیلامی کا عمل مکمل کرنے کا پلان موجود ہے۔اعلامیے میں بتایا گیا ہے کہ ملک بھر میں اس وقت صرف 30 لاکھ فائیو جی ڈیوائسز دستیاب ہیں، جبکہ فائیو جی سروس کے مؤثر آغاز کے لیے کروڑوں ڈیوائسز درکار ہوں گی۔ مزید یہ کہ پاکستان میں اب بھی 60 فیصد صارفین ٹو جی سروسز استعمال کر رہے ہیں اور بڑی آبادی جدید نیٹ ورک تک رسائی سے محروم ہے۔دوسری جانب ماہرین کا کہنا ہے کہ موبائل فونز پر بھاری درآمدی ٹیکس، پی ٹی اے رجسٹریشن فیس اور دیگر اخراجات فائیو جی ٹیکنالوجی کی حوصلہ شکنی کا سبب بن رہے ہیں۔ ملک میں اب تک مقامی سطح پر موبائل ڈیوائسز کی تیاری بھی شروع نہیں ہو سکی، جو فائیو جی کے فروغ میں ایک بڑی رکاوٹ ہے۔

اعداد و شمار کے مطابق پاکستان میں 15 فیصد سے بھی کم ٹیلی کام ٹاورز فائبر آپٹک نیٹ ورک سے منسلک ہیں، جبکہ فائیو جی سروس کے لیے فائبرائزیشن بنیادی شرط سمجھی جاتی ہے۔ماہرین کے مطابق جب تک انفراسٹرکچر، ڈیوائسز کی دستیابی اور پالیسی سطح پر رکاوٹوں کو دور نہیں کیا جاتا، فائیو جی اسپیکٹرم کی نیلامی کے باوجود عام صارفین اس جدید ٹیکنالوجی کے فوائد سے محروم رہ سکتے ہیں۔