سندھ طاس معاہدہ معطل نہیں ہو سکتا، آج بھی مکمل طور پر نافذ العمل ہے،انڈس واٹر کمشنر

پاکستان کے انڈس واٹر ٹریٹی (سندھ طاس معاہدہ) کے کمشنر سید مہر علی شاہ نے واضح کیا ہے کہ سندھ طاس معاہدے پر کسی قسم کی سیاسی گفتگو کی گنجائش نہیں اور یہ معاہدہ آج بھی مکمل طور پر نافذ العمل ہے۔

اسلام آباد میں سندھ طاس معاہدے کے موضوع پر منعقدہ ایک بین الاقوامی سیمینار سے خطاب کرتے ہوئے سید مہر علی شاہ نے کہا کہ سندھ طاس معاہدہ معطل نہیں ہو سکتا کیونکہ یہ سیاسی نہیں بلکہ خالصتاً ایک قانونی اور تکنیکی معاہدہ ہے۔ انہوں نے زور دے کر کہا کہ بھارت یک طرفہ طور پر اسے معطل یا ختم نہیں کر سکتا، یہ معاہدہ دو ایٹمی طاقتوں کے درمیان امن کی بنیاد ہے جس پر یکطرفہ اقدامات کی کوئی گنجائش نہیں۔

سید مہر علی شاہ کا مزید کہنا تھا کہ سندھ طاس معاہدہ پاکستان کی زراعت، غذائی تحفظ اور معیشت سے جڑا ہوا ہے اور یہ 24 کروڑ پاکستانیوں کی زندگی کا معاملہ ہے۔ پاکستان اپنے حصے میں آنے والے پانی کے ہر قطرے کا تحفظ کرے گا اور اپنے قانونی حق پر کسی قسم کا دباؤ یا جبر قبول نہیں کرے گا۔

کمشنر سندھ طاس نے بتایا کہ عالمی ثالثی عدالت واضح طور پر قرار دے چکی ہے کہ بھارت سندھ طاس معاہدے کو یکطرفہ طور پر نہ معطل کر سکتا ہے اور نہ ہی ختم کر سکتا ہے۔ عدالت نے یہ ہدایت بھی کی تھی کہ بھارت مغربی دریاؤں کے قدرتی بہاؤ میں کسی قسم کی رکاوٹ یا خلل پیدا نہ کرے، کیونکہ ایسا کرنا معاہدے کی روح کے منافی ہوگا۔ انہوں نے افسوس کا اظہار کیا کہ بھارت اگست 2023ء سے سندھ طاس معاہدے کے تحت اپنی بعض ذمہ داریوں پر عمل نہیں کر رہا، جو نہ صرف اس معاہدے بلکہ بین الاقوامی قوانین اور ریاستی ذمہ داریوں کی بھی صریح خلاف ورزی ہے۔