بھارتی اداکارہ دیویانکا سیروہی 30 برس کی عمر میں چل بسیں

ہریانہ سے تعلق رکھنے والی معروف اداکارہ اور سوشل میڈیا اسٹار دیویانکا سیروہی 30 سال کی عمر میں اچانک دل کا دورہ پڑنے سے انتقال کر گئی ہیں۔ بھارتی میڈیا رپورٹس کے مطابق دیویانکا کو پیر کی رات اتر پردیش میں واقع اپنی رہائش گاہ پر دل کی تکلیف ہوئی، جس پر انہیں فوری طور پر اسپتال منتقل کیا گیا، تاہم وہ جانبر نہ ہو سکیں اور ڈاکٹروں نے ان کی موت کی تصدیق کر دی۔

دیویانکا سیروہی نے اپنے کیریئر کا آغاز ٹک ٹاک سے کیا تھا اور ایک ویڈیو وائرل ہونے کے بعد وہ ملک بھر میں مشہور ہو گئی تھیں۔ انہوں نے علاقائی انٹرٹینمنٹ انڈسٹری، خاص طور پر ہریانوی میوزک انڈسٹری میں اپنی پہچان بنائی اور گلوکار معصوم شرما کے ساتھ کئی مقبول گانوں میں اداکاری کے جوہر دکھائے۔ ان کی مقبولیت کا اندازہ اس بات سے لگایا جا سکتا ہے کہ انسٹاگرام پر ان کے فالوورز کی تعداد 1.3 ملین سے زائد تھی۔

اداکارہ کی اچانک موت نے شوبز انڈسٹری اور ان کے مداحوں کو گہرے صدمے میں مبتلا کر دیا ہے، اور سوشل میڈیا پر فنکار برادری کی جانب سے تعزیت کا سلسلہ جاری ہے۔ دیویانکا غازی آباد میں اپنے والدین اور دادی کے ساتھ مقیم تھیں، تاہم ان کے اہل خانہ کی جانب سے تاحال کوئی باضابطہ تفصیلی بیان جاری نہیں کیا گیا۔