بھارت باز نہ آیا؛ پاکستان مخالف فلم دھریندر پارٹ ٹو بنانے کی تیاری

بالی ووڈ کی معروف پاکستان مخالف فلم ’’دھریندر‘‘ کے سیکوئل ’’دی ریوینج‘‘ کی باقاعدہ نمائش کے لیے 19 مارچ 2026 کی تاریخ مقرر کر دی گئی ہے۔ بھارتی ذرائع ابلاغ کے مطابق فلم کے دوسرے حصے کا عندیہ پہلے حصے کے اختتامی پوسٹ کریڈٹ منظر میں دیا گیا تھا، جو 5 دسمبر 2025 کو ریلیز ہوا تھا۔

سیکوئل میں مرکزی کردار حمزہ/جسکرت کی ماضی کی زندگی اور پس منظر کو تفصیل سے دکھایا گیا ہے، جسے اداکار رنویر سنگھ نے نبھایا ہے۔ کہانی کے مطابق جسکرت ایک سزائے موت کے قیدی سے بھارتی خفیہ ادارے کے سربراہ اجے سنائل کی نگرانی میں ایک تربیت یافتہ ایجنٹ بنتا ہے۔ فلم میں اس کے سفر کو جذباتی انداز میں پیش کیا گیا ہے، جہاں وہ اپنے عزائم، وفاداری اور کراچی کے علاقے لیاری میں طاقت کے منفی اثرات کے درمیان مشکل فیصلوں سے دوچار ہوتا ہے۔

فلم کی ریلیز کو عید کے ساتھ ساتھ بھارت کے تہوار گودی پڈوا اور اوگادی سے ہم آہنگ کیا گیا ہے، جس کے باعث اسے ایک بڑی تعطیلاتی فلم کے طور پر دیکھا جا رہا ہے۔

رپورٹس کے مطابق جہاں فلم کا پہلا حصہ صرف ہندی زبان میں ریلیز کیا گیا تھا، وہیں سیکوئل کو ہندی کے ساتھ ساتھ تیلگو، تمل، کنڑ اور ملیالم زبانوں میں بیک وقت نمائش کے لیے پیش کیا جائے گا۔

فلم کی تیاری جے آئی او اسٹوڈیوز اور بی 62 اسٹوڈیوز کے اشتراک سے کی گئی ہے، جبکہ کہانی پہلے حصے کے سنسنی خیز اختتام سے ہی آگے بڑھتی ہے اور انتقام کے مرکزی خیال کے گرد گھومتی ہے۔