عمران عباس مرحوم والدہ کے لیے لکھی نظم سناتے ہی آنسو روک نہ سکے

پاکستانی شوبز انڈسٹری کے معروف اداکار عمران عباس اپنی مرحوم والدہ کے لیے لکھی گئی نظم پیش کرتے ہوئے جذبات پر قابو نہ رکھ سکے اور آبدیدہ ہو گئے۔ یہ منظر اسلام آباد میں منعقدہ ادبی تقریب ‘جشنِ جون ایلیا’ کے دوران دیکھنے میں آیا، جس نے حاضرین کو بھی جذباتی کر دیا۔

عمران عباس نے اس تقریب کی ویڈیوز سوشل میڈیا پر شیئر کیں جن میں وہ اپنی والدہ کے انتقال کے بعد پہلی عید پر لکھی گئی نظم سناتے دکھائی دیتے ہیں۔ نظم کے دوران ان کی آواز بھرا گئی اور آنکھوں سے آنسو چھلک پڑے، جس پر حاضرین نے خاموشی اور احترام کے ساتھ ان کے جذبات کو سراہا۔

اداکار نے انسٹاگرام پر ایک پیغام میں مداحوں کی محبت اور حوصلہ افزائی پر شکریہ ادا کرتے ہوئے کہا کہ یہ نظم انہوں نے اپنی والدہ کے انتقال کے بعد پہلی عید کے موقع پر دل کی گہرائیوں سے لکھی تھی۔ عمران عباس کا کہنا تھا کہ انہیں مداحوں کی جانب سے ملنے والی بے پناہ محبت اور تعریف نے حوصلہ دیا۔

سوشل میڈیا صارفین نے بھی عمران عباس کے اس جذباتی لمحے کو سراہتے ہوئے ان سے دلی ہمدردی اور محبت کا اظہار کیا۔