عماد وسیم کی دوسری اہلیہ کے رومانوی انداز پر صارفین کی تنقید

قومی کرکٹر عماد وسیم اور ان کی دوسری اہلیہ نائلہ راجہ ان دنوں سوشل میڈیا صارفین کے نشانے پر ہیں۔ پاکستان سپر لیگ (PSL) کے گیارہویں ایڈیشن میں اسلام آباد یونائیٹڈ کی نمائندگی کرنے والے عماد وسیم کو ان کی اہلیہ نائلہ راجہ نے اسٹیڈیم پہنچ کر سرپرائز دیا، جس کی ویڈیو سوشل میڈیا پر شیئر کی گئی۔ تاہم، اس رومانوی انداز کو عوامی سطح پر شدید تنقید کا سامنا کرنا پڑ رہا ہے۔ صارفین کی ناراضگی کی بڑی وجہ وہ مبینہ حقائق ہیں جن کے مطابق عماد وسیم اور نائلہ کے درمیان تعلق اس وقت قائم ہوا جب کرکٹر کی اپنی پہلی اہلیہ ثانیہ اشفاق سے طلاق نہیں ہوئی تھی اور وہ اپنے تیسرے بچے کی امید سے تھیں۔

انٹرنیٹ پر نائلہ راجہ، جو خود ایک لائف اسٹائل انفلوئنسر ہیں، کو ان کی سوشل میڈیا ریلز اور اسٹیڈیم میں موجودگی پر سخت جملوں کا سامنا ہے۔ اگرچہ میچ کے دوران عوام کو اسٹیڈیم میں داخلے کی اجازت نہیں تھی، لیکن نائلہ کی شرکت اور گراؤنڈ میں لی گئی سیلفی نے نئی بحث چھیڑ دی ہے۔ صارفین نے ان کے انداز کو “نمائش” قرار دیتے ہوئے مختلف تبصرے کیے ہیں۔ ایک صارف نے نائلہ کو انوشکا شرما کی “سستی نقل” قرار دیا، جبکہ ایک اور صارف نے طنزیہ طور پر لکھا کہ “ایک دن عماد تمہیں بھی کسی نئے افیئر سے سرپرائز دے گا”۔

عماد وسیم کی پہلی اہلیہ ثانیہ اشفاق سے علیحدگی اور فوری بعد نائلہ راجہ سے شادی کے فیصلے نے کرکٹ شائقین اور سوشل میڈیا صارفین میں ایک تقسیم پیدا کر دی ہے۔ جہاں کچھ لوگ اسے کھلاڑی کی ذاتی زندگی قرار دے رہے ہیں، وہیں اکثریت نائلہ راجہ کی ویڈیوز پر تبصرہ کرتے ہوئے اسے خاندانی اقدار کے منافی قرار دے رہی ہے۔ فی الحال اس تنقید پر جوڑے کی جانب سے کوئی باقاعدہ ردعمل سامنے نہیں آیا، لیکن سوشل میڈیا پر یہ معاملہ ٹاپ ٹرینڈ بنا ہوا ہے۔