یوٹیوبرز کا نام سفری پابندی کی فہرست سے نکالنے کے کیس میں اہم پیش رفت

اسلام آباد: اسلام آباد ہائیکورٹ نے پاسپورٹ کنٹرول لسٹ (PCL) سے نام نکالنے کے معاملے پر یوٹیوبر رجب بٹ کی درخواست پر سماعت ملتوی کر دی ہے، جبکہ ٹک ٹاکر ندیم نانی والا کی درخواست عدالتی رپورٹ کی روشنی میں نمٹا دی گئی ہے۔ جسٹس محمد اعظم خان نے دونوں درخواستوں پر سماعت کی۔

دورانِ سماعت، اسسٹنٹ اٹارنی جنرل نے رجب بٹ کے کیس میں وفاقی حکومت کی جانب سے جواب جمع کرانے کے لیے مزید وقت مانگا، جسے عدالت نے منظور کرتے ہوئے سماعت آئندہ تاریخ تک ملتوی کر دی۔

دوسری جانب، ندیم نانی والا (جن کا اصل نام ندیم مبارک ہے) کے کیس میں ڈائریکٹر لیگل این سی سی آئی اے (NCCIA) سرفراز کھٹانہ نے عدالت میں اہم رپورٹ پیش کی۔ رپورٹ میں انکشاف کیا گیا کہ ندیم مبارک کا نام نیشنل سائبر سکیورٹی ایجنسی کی سفارش پر پاسپورٹ رولز 2021 کے تحت لسٹ میں شامل کیا گیا تھا کیونکہ وہ لاہور میں درج ایک انکوائری کیس میں نامزد ہیں۔ تاہم، اب این سی سی آئی اے ہیڈ کوارٹر کی حالیہ سفارش پر ان کا نام پی سی ایل سے نکال دیا جائے گا۔ عدالت نے اس یقین دہانی کے بعد ندیم نانی والا کی درخواست کو باقاعدہ نمٹا دیا ہے۔