ٹی20 ورلڈکپ: پاکستان کے بھارت سے بائیکاٹ پر آئی سی سی کا سخت ردِعمل

ٹی ٹوئنٹی ورلڈکپ 2026 میں پاکستان کی جانب سے بھارت کے خلاف میچ کے بائیکاٹ کے فیصلے پر انٹرنیشنل کرکٹ کونسل (آئی سی سی) نے ردِعمل دیتے ہوئے کھیل کے عالمی اصول یاد دلا دیے ہیں۔

آئی سی سی کی جانب سے اپنی ویب سائٹ پر جاری بیان میں کہا گیا ہے کہ ادارہ پاکستان کرکٹ بورڈ کی جانب سے باضابطہ فیصلے سے آگاہ کیے جانے کا منتظر ہے۔ بیان کے مطابق کسی مخصوص میچ میں شرکت نہ کرنے کی پوزیشن کو عالمی کھیلوں کے ایونٹس کی بنیاد کے ساتھ ہم آہنگ کرنا مشکل ہے، جہاں تمام ٹیموں سے برابر شرائط پر شیڈول کے مطابق مقابلہ کرنے کی توقع کی جاتی ہے۔

آئی سی سی نے واضح کیا کہ ٹورنامنٹس کی بنیاد کھیلوں کی سالمیت، مسابقت، مستقل مزاجی اور انصاف پر ہوتی ہے اور منتخب میچز میں شرکت مقابلوں کی افادیت کو متاثر کر سکتی ہے۔

بیان میں یہ بھی کہا گیا کہ آئی سی سی قومی پالیسی معاملات میں حکومتوں کے کردار کا احترام کرتی ہے، تاہم یہ فیصلہ پاکستان کے کروڑوں شائقین سمیت دنیا بھر کے کرکٹ فینز کے مفاد میں نہیں اور اس سے بین الاقوامی کرکٹ کے نظام پر اثر پڑ سکتا ہے۔

آئی سی سی کے مطابق اس کی اولین ترجیح مینز ٹی ٹوئنٹی ورلڈکپ کا کامیاب انعقاد ہے، جس کی ذمہ داری پی سی بی سمیت تمام رکن بورڈز پر عائد ہوتی ہے۔
آئی سی سی نے امید ظاہر کی کہ پاکستان ایسا حل تلاش کرے گا جو تمام اسٹیک ہولڈرز کے مفادات کا تحفظ کرے۔