اداکارہ حمیرا بانو نے شادی کی خبر مداحوں سے شیئر کردی

کراچی: پاکستانی ڈرامہ انڈسٹری کی معروف اور سینئر اداکارہ حمیرا بانو نے سوشل میڈیا پر اچانک اپنی شادی کی خبر شیئر کر کے مداحوں کو حیران کر دیا ہے۔

اداکارہ نے اپنے آفیشل سوشل میڈیا اکاؤنٹ پر شوہر کے ہمراہ دلکش تصاویر پوسٹ کیں، تاہم انہوں نے اپنے شریکِ حیات کی شناخت اور چہرہ راز میں رکھا ہے۔ وائرل ہونے والی تصاویر میں اداکارہ کے شوہر کا رخ کیمرے کی مخالف سمت میں ہے جس کی وجہ سے صرف ان کی پشت دکھائی دے رہی ہے۔

تصاویر کے ساتھ حمیرا بانو نے ایک جذباتی تحریر لکھی: “کبھی کبھی ہم اپنے لیے کچھ منصوبہ بندی کرتے ہیں لیکن اللہ ہمارے لیے کچھ اور منصوبہ رکھتا ہے اور جب رب ‘کن’ فرما دے تو پھر منزل آسان ہو جاتی ہے۔”

شادی کی خبر منظرِ عام پر آتے ہی شوبز انڈسٹری کی نامور شخصیات اور مداحوں کی جانب سے مبارکباد کے پیغامات کا تانتا بندھ گیا ہے۔ مایا خان، صباحت بخاری، منشا ملک اور عرفان موری والا سمیت متعدد فنکاروں نے ان کی نئی زندگی کی شروعات پر نیک خواہشات کا اظہار کیا ہے۔

حمیرا بانو نے اپنے طویل فنی کیریئر میں متعدد ہٹ ڈراموں میں اداکاری کے جوہر دکھائے ہیں اور بالخصوص ماں کے کرداروں میں بے حد مقبولیت حاصل کی ہے۔ ان کے مشہور ڈراموں میں ‘دیوانگی’، ‘مہرپوش’، ‘میرا رب وارث’، ‘ملالِ یار’، ‘ڈولی ڈارلنگ’ اور ‘محروم’ شامل ہیں۔