1 سال تک میں بینائی سے محروم رہا: حسن شہریار

پاکستانی فیشن انڈسٹری کے معروف اور مقبول ترین ڈیزائنر و اداکار حسن شہریار یاسین، جو ایچ ایس وائی (HSY) کے نام سے جانے جاتے ہیں، نے انکشاف کیا ہے کہ وہ ایک خوفناک حادثے کے نتیجے میں تقریباً ایک سال تک بینائی سے مکمل طور پر محروم رہے تھے۔

حال ہی میں ایک پوڈکاسٹ میں شرکت کے دوران ایچ ایس وائی نے اپنے بچپن کی مشکلات، والدہ کی قربانیوں اور زندگی کے اس کٹھن ترین دور کے حوالے سے کھل کر گفتگو کی۔ انہوں نے بینائی سے محرومی کی وجہ بننے والے حادثے کا ذکر کرتے ہوئے بتایا کہ رمضان کے دن تھے جب وہ اور ان کا دوست افطاری کے لیے کھانا لینے باہر گئے تھے۔ واپسی پر گاڑی ان کا دوست چلا رہا تھا کہ اسی دوران اذان ہو گئی، اور جب انہوں نے کھانے کا پیکٹ کھولا تو اس سے اٹھنے والی شدید بھاپ کی وجہ سے گاڑی کے اندر ہر چیز دھندلا گئی۔

ایچ ایس وائی نے بتایا کہ جب تک ان کا دوست گاڑی کے شیشے صاف کرتا، گاڑی بے قابو ہو کر سڑک سے اتر گئی اور ایک حادثے کا شکار ہو گئی۔ اس ٹکر کے نتیجے میں وہ زور دار طریقے سے ونڈ اسکرین سے جا ٹکرائے، اور اس حادثے کی شدت اتنی زیادہ تھی کہ ان کی دونوں آنکھوں کی بینائی چلی گئی۔

اچانک پیش آنے والے اس سانحے نے ان کی زندگی کو یکسر بدل کر رکھ دیا۔ فیشن ڈیزائنر نے بتایا کہ اس ایک سال کے دوران شدید ذہنی دباؤ اور مشکلات کا سامنا رہا، لیکن اس دوران ان کے دیگر حواس (Senses) بہت زیادہ تیز ہو گئے تھے۔ انہوں نے اپنے تجربے کا اشتراک کرتے ہوئے کہا کہ جب آنکھیں کام کرنا چھوڑ دیتی ہیں تو اللہ تعالی انسان کی دوسری صلاحیتوں کو مزید طاقتور بنا دیتا ہے؛ وہ چار کمروں کے فاصلے سے بھی اپنی والدہ کے رونے کی آواز ایسے سن لیتے تھے جیسے وہ بالکل ان کے قریب بیٹھی ہوں۔

ایچ ایس وائی کے مطابق، تقریباً ایک سال تک وہ اندھیرے میں رہنے پر مجبور رہے، جس کے بعد ان کا کامیاب علاج اور متعدد سرجریز کیں گئیں، اور طویل تکلیف دہ مرحلے کے بعد بالآخر ان کی بینائی واپس لوٹ آئی۔