چاند پر رہائش کیلئے بننے والے گھر کیسے ہوں گے؟

مستقبل میں چاند اور مریخ پر آباد ہونے والے انسانوں کے لیے تھری ڈی پرنٹنگ سے تیار کیے جانے والے گھروں کے جدید اور منفرد ڈیزائن منظرِ عام پر آ گئے ہیں۔ یہ ڈیزائن ناسا کے زیرِ اہتمام سینٹینیل چیلنج کے تحت تیار کیے گئے، جس کا مقصد گہری خلائی مہمات کے لیے پائیدار اور قابلِ عمل رہائشی ڈھانچوں کی تیاری تھا۔ یہ مقابلہ چار برس تک جاری رہا۔

مقابلے میں شریک ماہر ڈیزائنرز اور انجینئرز نے ایسے خلائی گھروں کے تصورات پیش کیے جو کم سے کم انسانی مداخلت کے ساتھ تھری ڈی پرنٹنگ کے ذریعے تعمیر کیے جا سکیں۔ یہ ڈیزائن اس بات کی جھلک پیش کرتے ہیں کہ مستقبل میں خلا میں طویل قیام کے دوران انسان کس طرز کے گھروں میں رہائش اختیار کر سکتے ہیں۔

ناسا کے مطابق ان گھروں کی تعمیر میں مقامی وسائل کو ترجیح دی جائے گی، جیسے چاند یا مریخ کی سطح پر موجود مٹی (ریگولتھ)، تاکہ زمین سے سامان لے جانے کی لاگت، وزن اور پیچیدگی میں کمی لائی جا سکے۔

ناسا کے سینئر عہدیدار اسٹیو جرزِک نے کہا کہ خلا میں انسانی موجودگی کے لیے محفوظ اور پائیدار رہائش بنیادی ضرورت ہے، تاہم خلائی جہازوں میں وزن اور جگہ محدود ہوتی ہے۔ اسی لیے ایسی ٹیکنالوجی پر کام کیا جا رہا ہے جس میں زمین سے لائے گئے محدود مواد کو وہاں دستیاب وسائل کے ساتھ ملا کر استعمال کیا جا سکے۔

انہوں نے کہا کہ جب زمین پر ری سائیکلنگ ممکن ہے تو مریخ پر بھی اس تصور کو عملی شکل دی جا سکتی ہے۔

اگرچہ فی الحال اس بات کی کوئی حتمی ضمانت نہیں کہ یہ ڈیزائن عملی طور پر چاند یا مریخ پر تعمیر کیے جا سکیں گے، تاہم ماہرین کے مطابق یہ تصورات مستقبل کی خلائی آبادکاری کی جانب ایک اہم پیش رفت ہیں اور آنے والے وقت میں انسانوں کی دوسرے سیاروں پر مستقل رہائش کی بنیاد بن سکتے ہیں۔