یو یو ہنی سنگھ نے دبئی کو محفوظ قرار دے دیا

امریکا اور اسرائیل کے ایران پر حملوں کے بعد خلیجی خطے میں کشیدگی اور ممکنہ دھماکوں کی خبروں کے باعث عوام میں تشویش کی لہر دوڑ گئی ہے۔

ابوظبی، دبئی، قطر اور کویت میں دھماکوں کی اطلاعات کے بعد سوشل میڈیا پر بھی افواہوں کا سلسلہ شروع ہوگیا جس سے لوگوں میں خوف و ہراس پیدا ہوا۔

اس صورتحال کے دوران دبئی میں موجود معروف بھارتی ریپر یو یو ہنی سنگھ نے مداحوں کو یقین دلایا ہے کہ شہر میں حالات معمول کے مطابق ہیں اور دبئی مکمل طور پر محفوظ ہے۔

یو یو ہنی سنگھ نے انسٹاگرام پر ایک ویڈیو شیئر کرتے ہوئے کہا کہ دبئی میں سب کچھ بالکل ٹھیک ہے اور یہاں کا ماحول مکمل طور پر محفوظ ہے، اس لیے خبروں میں آنے والی بے بنیاد افواہوں پر یقین نہ کیا جائے۔

بعد ازاں انہوں نے دبئی کے ایک اسٹوڈیو سے ایک اور ویڈیو بھی پوسٹ کی جس میں وہ اپنی ٹیم کے ساتھ میوزک پر کام کرتے دکھائی دیے۔ ویڈیو کے ساتھ انہوں نے لکھا کہ ہم دبئی میں محفوظ ہیں اور کام معمول کے مطابق جاری ہے۔

واضح رہے کہ یو یو ہنی سنگھ حال ہی میں پاکستانی فنکاروں وہاب بگٹی اور صاحبان کے ساتھ ایک میوزک البم بھی ریلیز کر چکے ہیں جسے مداحوں کی جانب سے کافی پسند کیا جا رہا ہے۔