ہالی ووڈ اداکار میل گبسن اور انکی ساتھی روزالینڈ راس کی علیحدگی کی تصدیق

لاس اینجلس: ہالی ووڈ کے معروف اداکار میل گبسن اور ان کی دیرینہ ساتھی روزالینڈ راس نے باہمی علیحدگی کی تصدیق کر دی ہے۔ غیر ملکی میڈیا رپورٹس کے مطابق 69 سالہ میل گبسن اور 35 سالہ روزالینڈ راس خاموشی سے تقریباً ایک سال قبل ایک دوسرے سے الگ ہو چکے تھے۔

سابق جوڑے کے مطابق ان کا ایک 8 سالہ بیٹا بھی ہے، جس کی پرورش دونوں مشترکہ طور پر جاری رکھیں گے۔ پیپلز میگزین کو جاری کیے گئے مشترکہ بیان میں انہوں نے کہا کہ اگرچہ یہ فیصلہ ان کے لیے افسوسناک ہے، تاہم وہ اپنے بیٹے کی خاطر بہترین والدین بننے کے لیے پرعزم ہیں۔

بیان میں مزید کہا گیا کہ زندگی کے اس باب کے اختتام کے باوجود وہ اپنے بیٹے کی خوشحال اور محفوظ پرورش کو اولین ترجیح دیں گے۔

واضح رہے کہ میل گبسن اس سے قبل رابن ڈینس مور کے ساتھ شادی کے بندھن میں منسلک تھے، تاہم 26 سالہ ازدواجی رفاقت کے بعد یہ شادی 2006 میں اختتام پذیر ہو گئی تھی۔