اداکارہ حبا بخاری نے وائرل کلپ میں اپنی تصویر کی وضاحت دیدی

سوشل میڈیا پر گزشتہ کچھ عرصے سے پی ٹی وی کی ایک میوزیکل نائٹ کا پرانا کلپ گردش کر رہا تھا جس میں موجود لڑکی کی مشابہت اداکارہ حبا بخاری سے ہونے پر مداح حیران تھے۔ اب حبا بخاری نے خود اس معمہ کو حل کر دیا ہے۔ ایک حالیہ انٹرویو میں انہوں نے تصدیق کی کہ ویڈیو میں نظر آنے والی کم عمر لڑکی کوئی اور نہیں بلکہ وہ خود ہی تھیں۔ اداکارہ نے بتایا کہ یہ کلپ تقریباً 2011 کا ہے جب وہ ساتویں یا آٹھویں جماعت میں پڑھتی تھیں۔ انہوں نے مزید کہا کہ وہ اپنے خاندان کے ہمراہ اس پروگرام میں شریک ہوئی تھیں کیونکہ ان کے ایک عزیز پی ٹی وی کے ٹیکنیکل ڈیپارٹمنٹ میں کام کرتے تھے۔