لندن ہیتھرو ایئرپورٹ نے بھی 100 ملی لیٹر مائع سکیورٹی پابندی ختم کر دی

عالمی فضائی سفر کے شعبے میں ایک اہم پیش رفت سامنے آئی ہے جہاں دبئی کے بعد اب لندن کے ہیتھرو ایئرپورٹ نے بھی مسافروں کے لیے مائع اشیاء پر عائد 100 ملی لیٹر کی سکیورٹی پابندی ختم کر دی ہے۔

متحدہ عرب امارات کے ایک نجی اخبار کی رپورٹ کے مطابق ہیتھرو ایئرپورٹ پر جدید تھری ڈی اسکینرز نصب کر دیے گئے ہیں، جن کی مدد سے اب مسافروں کو ہاتھ کے سامان میں موجود مائع اشیاء علیحدہ نکالنے یا محدود مقدار میں رکھنے کی ضرورت نہیں رہے گی۔

نئے سکیورٹی نظام کے باعث سکیورٹی چیک کا عمل تیز اور مؤثر ہو جائے گا، جس سے مسافروں کو نمایاں سہولت حاصل ہوگی۔ اس سے قبل دبئی انٹرنیشنل ایئرپورٹ بھی اسی نوعیت کی جدید ٹیکنالوجی متعارف کرا چکا ہے۔

ماہرین کے مطابق یہ اقدام مستقبل میں دیگر بڑے عالمی ایئرپورٹس کے لیے بھی مثال بن سکتا ہے۔ پاکستانی مسافروں کے لیے یہ خبر خصوصی اہمیت رکھتی ہے کیونکہ برطانیہ اور متحدہ عرب امارات پاکستانیوں کے اہم سفری مراکز سمجھے جاتے ہیں۔