حسن جہانگیر نے اپنی زندگی کے بڑے سانحے سے پردہ اٹھا دیا

نامور پاکستانی گلوکار حسن جہانگیر نے حال ہی میں اپنی ذاتی زندگی کے ایک بڑے سانحے سے پردہ اٹھایا ہے۔

حسن جہانگیر، جنہوں نے اپنے کیریئر کا آغاز 1986 میں کیا، پاکستان کے معروف اور لیجنڈری گلوکاروں میں شمار ہوتے ہیں اور تقریباً چار دہائیوں بعد بھی اپنی موسیقی اور شخصیت کی بدولت مقبول ہیں۔ وہ ہمیشہ ایک خوش مزاج اور پُرجوش راک اسٹار کے طور پر جانے جاتے رہے ہیں، تاہم انہوں نے اپنی نجی زندگی کو عموماً میڈیا سے دور رکھا۔

حال ہی میں ایک نجی ٹی وی چینل کی رمضان ٹرانسمیشن میں بطور مہمان گفتگو کرتے ہوئے انہوں نے بتایا کہ تقریباً 27 سے 28 سال قبل ان کی اہلیہ کا انتقال ہو گیا تھا۔ اس وقت ان کی بیٹی بہت چھوٹی تھیں، جس کے بعد انہوں نے اپنی پوری توجہ بیٹی کی پرورش پر مرکوز کر دی اور دوبارہ شادی نہیں کی۔

انہوں نے بتایا کہ ان کی صرف ایک ہی بیٹی ہے جو اب شادی کے بعد سوئیڈن میں مقیم ہیں اور پیشے کے اعتبار سے ڈاکٹر ہیں۔

حسن جہانگیر نے مزید کہا کہ ان کی والدہ اور بہنوں نے بیٹی کی پرورش میں ان کا بھرپور ساتھ دیا۔ ان کے مطابق اب ان کی بیٹی خود چاہتی ہیں کہ وہ دوبارہ شادی کر لیں تاکہ وہ تنہا نہ رہیں۔