ہرش وردھن اور سنجیدہ شیخ ایک ساتھ چھٹیاں منا رہے ہیں؟ مماثل تصاویر نے ڈیٹنگ کی افواہیں بڑھا دیں

بالی ووڈ اداکار ہرش وردھن رانے اور معروف اداکارہ سنجیدہ شیخ کی الگ الگ شیئر کی گئی انسٹاگرام تصاویر نے ایک بار پھر ان کے درمیان مبینہ تعلقات اور ڈیٹنگ کی افواہوں کو گرم کر دیا ہے۔

رپورٹس کے مطابق دونوں اداکاروں نے پونے کے قریب خوبصورت مقام پنسیت (Panshet) میں چھٹیوں کے دوران لی گئی تصاویر اپنے اپنے انسٹاگرام اکاؤنٹس پر شیئر کیں۔ اگرچہ دونوں نے اپنی پوسٹس میں ایک دوسرے کو ٹیگ یا ذکر نہیں کیا، تاہم مداحوں نے باریک بینی سے نوٹس کیا کہ دونوں کی تصاویر کا پس منظر، ماحول اور یہاں تک کہ ناشتے میں موجود چائے اور آملیٹ کی تصاویر بھی بالکل ایک جیسی تھیں۔ اس مماثلت نے سوشل میڈیا پر ان کے ایک ساتھ سفر کرنے اور رشتہ ازدواج یا ڈیٹنگ میں ہونے کی افواہوں کو دوبارہ جلا بخش دی ہے۔

واضح رہے کہ یہ پہلی بار نہیں جب دونوں کو ایک ساتھ جوڑا جا رہا ہو۔ اس سے قبل 2023ء میں بھی گِر فاریسٹ (Gir Forest) میں سفاری کے دوران دونوں کی الگ الگ تصاویر کے پس منظر میں ایک ہی جیپ دکھائی دینے پر ڈیٹنگ کی خبریں وائرل ہوئی تھیں۔ تاہم، ہرش وردھن رانے اور سنجیدہ شیخ نے ہمیشہ اپنی ذاتی زندگی کو نجی رکھا ہے اور اب تک اپنے رشتے کی باضابطہ تصدیق یا تردید نہیں کی ہے۔