’’دعا کریں میری بھی شادی ہوجائے‘‘، ہانیہ عامر کی ویڈیو کال وائرل

کراچی: پاکستانی شوبز انڈسٹری کی مقبول اداکارہ ہانیہ عامر ایک بار پھر سوشل میڈیا پر اپنی ایک مداح کے ساتھ ویڈیو کال کے باعث توجہ کا مرکز بن گئی ہیں۔ وائرل ہونے والے مختصر ویڈیو کلپ میں اداکارہ کو اپنی ایک خاتون مداح کے ساتھ نہایت خوش اخلاقی اور دوستانہ انداز میں گفتگو کرتے دیکھا جا سکتا ہے۔

ویڈیو کے دوران مداح نے ہانیہ عامر سے ان کی مصروفیات، گھر والوں کی خیریت اور رمضان المبارک کے روزوں کے بارے میں دریافت کیا۔ اداکارہ نے مسکراتے ہوئے بتایا کہ ان کے روزے بہت اچھے گزر رہے ہیں اور وہ اپنے کام میں بھی مصروف ہیں۔ گفتگو کے دوران جب مداح نے ان کے ڈرامے ‘میری زندگی ہے تو’ کی تعریف کی اور لگے ہاتھوں ان سے شادی سے متعلق سوال کر ڈالا، تو ہانیہ عامر نے ہلکے پھلکے انداز میں جواب دیا۔

اداکارہ نے بتایا کہ ابھی ان کی شادی نہیں ہوئی اور مداح سے درخواست کی کہ وہ ان کے لیے دعا کریں۔ جس پر خاتون مداح نے انہیں اچھے نصیب اور جلد شادی کی دعائیں دیں۔ سوشل میڈیا صارفین ہانیہ عامر کے اس سادہ اور عاجزانہ رویے کو بے حد سراہ رہے ہیں۔