ہراسانی و استحصال ناقابل برداشت ہے ، ہانیہ عامر کا دوٹوک موقف

عالمی شہرت یافتہ پاکستانی اداکارہ ہانیہ عامر نے سوشل میڈیا پر سامنے آنے والے حالیہ تنازع پر اپنا موقف واضح کیا ہے۔

حال ہی میں سابق ماڈل ماہ نور رحیم نے ہانیہ عامر پر پروڈیوسر عمر مختار کی دوست ہونے کی بنیاد پر تنقید کی تھی، جن پر ہراسانی کے الزامات عائد کیے گئے ہیں۔

اداکارہ نے انسٹاگرام کی اسٹوری کے ذریعے وضاحت دی کہ سوشل میڈیا پر اس تنازع میں ان کا نام لیا گیا، لیکن انہیں اس معاملے کا کوئی علم نہیں اور نہ ہی وہ اس میں شامل تھیں۔

ہانیہ عامر نے بغیر کسی کا نام لیے کہا: “میں ہراسانی، استحصال اور کسی بھی ایسے رویے کے خلاف زیرو ٹالرنس رکھتی ہوں جو خواتین اور لڑکیوں کے وقار اور حفاظت کو متاثر کرے۔ یہ سنجیدہ مسائل ہیں جنہیں ہمیشہ احترام اور سنجیدگی کے ساتھ دیکھا جانا چاہیے۔”

انہوں نے پروڈیوسر کے خلاف آواز بلند کرنے والی خواتین کی حمایت کی اور خواتین و بچیوں کے لیے محفوظ ماحول کی اہمیت پر زور دیا۔ اداکارہ نے مزید کہا کہ انہوں نے متعلقہ فرد سے خود کو دور رکھنے کا فیصلہ کیا ہے اور کسی کے اعمال کو دوسرے سے نہ جوڑا جائے۔

ہانیہ نے کہا: “میری وابستگی تمام صنعتوں اور کمیونٹیز میں جوابدہی، احترام اور محفوظ جگہوں کو فروغ دینے کے لیے ہے۔ ہم سب کی ذمہ داری ہے کہ نقصان دہ رویوں کو چیلنج کریں، بولنے والوں کی حمایت کریں اور ایسے معیارات قائم رکھیں جو ہر وقت خواتین اور لڑکیوں کے وقار کا تحفظ کریں۔”