آنتوں میں موجود بیکٹیریا کا خطرناک بیماری کے لوٹنے سے تعلق کا انکشاف!

جدید طبی تحقیق نے جِلد کے کینسر (میلانوما) کے علاج کے حوالے سے ایک انقلابی انکشاف کیا ہے، جس کے مطابق انسان کی آنتوں میں موجود بیکٹیریا (Gut Microbiome) یہ بتانے میں مددگار ثابت ہو سکتے ہیں کہ علاج کے بعد کینسر کے دوبارہ لوٹنے کا کتنا خطرہ ہے۔ نیویارک یونیورسٹی لینگون ہیلتھ اور پرلمٹر کینسر سینٹر کے محققین کی یہ تحقیق سائنسی جرنل ‘سیل’ (Cell) میں شائع ہوئی ہے، جس نے کینسر کی تشخیص اور علاج کے بعد کی نگرانی کے عمل میں نئی امید جگا دی ہے۔

تحقیق کے دوران عالمی کلینیکل ٹرائل میں شامل 674 مریضوں کے نمونوں کا تجزیہ کیا گیا، جس سے معلوم ہوا کہ آنتوں میں موجود مخصوص بیکٹیریا کی مقدار میں فرق، کینسر کے دوبارہ ہونے کی پیش گوئی 94 فیصد تک درستگی کے ساتھ کر سکتا ہے۔ ماہرین کا کہنا ہے کہ میلانوما کے 25 سے 40 فیصد مریضوں میں سرجری اور امیونوتھراپی کے باوجود بیماری دوبارہ لوٹ آتی ہے، تاہم اب اس نئی دریافت سے ڈاکٹروں کو یہ سمجھنے میں آسانی ہوگی کہ کن مریضوں کو زیادہ سخت نگرانی یا اضافی علاج کی ضرورت ہے۔