یونان: کوسٹ گارڈ اور تارکین وطن کی کشتیوں میں تصادم، 14 افراد ہلاک

یونانی جزیرے کے قریب کوسٹ گارڈ اور تارکینِ وطن کو لے جانے والی کشتی کے درمیان خوفناک تصادم کے نتیجے میں بھاری جانی نقصان ہوا ہے۔

غیر ملکی خبر ایجنسی کے مطابق تارکینِ وطن کی کشتی لیبیا سے یورپ جانے والے مسافروں کو لے کر روانہ ہوئی تھی۔ حادثے کے نتیجے میں کم از کم 14 تارکینِ وطن ہلاک جبکہ متعدد زخمی ہوگئے ہیں۔

یونانی کوسٹ گارڈ حکام کا کہنا ہے کہ تصادم کے دوران سپیڈ بوٹ نے خطرناک حربے اختیار کیے اور فائرنگ بھی کی گئی۔ واقعے کے بعد سمندر میں گرنے والے افراد کی تلاش کے لیے ہیلی کاپٹر اور کشتیوں کے ذریعے ریسکیو آپریشن جاری ہے۔

حکام کے مطابق زخمیوں کو قریبی اسپتال منتقل کر دیا گیا ہے جبکہ واقعے کی تحقیقات بھی شروع کر دی گئی ہیں۔