پولیو کیخلاف بڑی کامیابی، 2025 میں کیسز میں نمایاں کمی

پاکستان میں پولیو کے خاتمے کی کوششوں میں سال 2025 کے دوران نمایاں کامیابی حاصل ہوئی ہے۔ نیشنل ایمرجنسی آپریشن سینٹر (نیشنل ای او سی) کے مطابق ملک میں پولیو کیسز کی تعداد 74 سے کم ہو کر 30 رہ گئی ہے، جو انسدادِ پولیو مہمات کی مؤثر حکمتِ عملی کا واضح ثبوت ہے۔

نیشنل ای او سی کا کہنا ہے کہ ستمبر 2025 کے بعد ملک بھر میں پولیو کا کوئی نیا کیس رپورٹ نہیں ہوا، جبکہ بلوچستان اور پنجاب میں تقریباً ایک سال سے پولیو کا کوئی کیس سامنے نہیں آیا، جو ایک نہایت حوصلہ افزا پیش رفت قرار دی جا رہی ہے۔

حکام کے مطابق رواں سال انسدادِ پولیو کی چھ اعلیٰ معیار کی قومی مہمات کامیابی سے منعقد کی گئیں، جن کے مثبت نتائج سامنے آئے۔ حالیہ قومی پولیو مہم کے دوران ملک بھر میں 98 فیصد سے زائد بچوں کو پولیو سے بچاؤ کے قطرے پلائے گئے۔

نیشنل ای او سی کے مطابق گزشتہ مہم کے مقابلے میں ویکسین سے محروم رہ جانے والے بچوں کی تعداد میں 18 فیصد کمی ریکارڈ کی گئی ہے، جو فیلڈ ٹیموں کی بہتر کارکردگی اور نگرانی کا نتیجہ ہے۔

حکام نے والدین اور فرنٹ لائن ہیلتھ ورکرز کی کاوشوں کو سراہتے ہوئے اس عزم کا اظہار کیا ہے کہ پولیو کے مکمل خاتمے تک انسدادِ پولیو مہمات کا سلسلہ پوری قوت سے جاری رکھا جائے گا۔