گوگل کا 40 فیصد اینڈرائیڈ فونز خطرے میں ہونے کا اعلان

گوگل نے کہا ہے کہ دنیا بھر میں موجود اینڈرائیڈ فونز میں سے تقریباً 40 فیصد ایسے ہیں جو نئے سائبر حملوں کا نشانہ بن سکتے ہیں۔ کمپنی نے اینڈرائیڈ اپ ڈیٹ جاری کرتے ہوئے تصدیق کی ہے کہ اینڈرائیڈ ٹوئیلو (Android 12) اور اس سے پرانے ورژن کے فونز اب اہم سکیورٹی اپ ڈیٹس نہیں حاصل کریں گے، اور صرف دنیا کے 58 فیصد فونز نئے حملوں کے خلاف محفوظ رہ سکیں گے۔

تازہ ترین اعداد و شمار کے مطابق دسمبر میں اینڈرائیڈ 16 صرف 7.5 فیصد فونز پر موجود تھا، اینڈرائیڈ 15 تقریباً 19.3 فیصد فونز پر، اینڈرائیڈ 14 تقریباً 17.9 فیصد فونز پر اور اینڈرائیڈ 13 تقریباً 13.9 فیصد فونز پر استعمال ہو رہا تھا۔ یہ چاروں ورژن اس لیے اہم ہیں کیونکہ گوگل اینڈرائیڈ 12 یا اس سے پرانے ورژن کے لیے سکیورٹی اپ ڈیٹس فراہم نہیں کرتا، جس کے نتیجے میں 40 فیصد سے زیادہ فونز اس سہولت سے محروم ہیں۔

ماہرین کے مطابق ایک ارب سے زائد صارفین ایسے ہیں جن کے فون نئے سائبر حملوں کے خطرے میں ہیں اور وہ اپنے فونز کو اپ ڈیٹ کے ذریعے محفوظ نہیں بنا سکتے۔

اس دوران ایپل کو اپنے آئی فون صارفین کو iOS 26 پر اپ گریڈ کرنے میں مشکلات کا سامنا ہے، لیکن یہ مسئلہ عارضی ہے کیونکہ آنے والے مہینوں میں زیادہ تر آئی فونز اپ ڈیٹ ہو جائیں گے۔ ایپل کے صرف چند آئی فونز ایسے ہیں جو مکمل طور پر سپورٹ سے باہر ہو چکے ہیں۔

ماہرین نے صارفین کو خبردار کیا ہے کہ اگر آپ کا اینڈرائیڈ فون اینڈرائیڈ 13 یا نئے ورژن پر اپ ڈیٹ نہیں ہو سکتا، تو نئے فون پر غور کرنا ضروری ہے تاکہ آپ کے ڈیٹا اور پرائیویسی کو سائبر حملوں سے محفوظ رکھا جا سکے۔