دنیا کے 40 فیصد اینڈرائیڈ فونز نئے سائبر حملوں کے خطرے سے دوچار

گوگل نے خبردار کیا ہے کہ دنیا بھر میں استعمال ہونے والے تقریباً 40 فیصد اینڈرائیڈ فونز نئے سائبر حملوں کے خطرے سے دوچار ہیں۔

کمپنی کے مطابق اینڈرائیڈ کے پرانے ورژنز استعمال کرنے والے ڈیوائسز میل ویئر اور اسپائی ویئر کے خلاف مؤثر تحفظ حاصل نہیں کر پا رہے۔

گوگل نے تازہ اینڈرائیڈ سیکیورٹی اپ ڈیٹ جاری کرتے ہوئے بتایا کہ اینڈرائیڈ 12 اور اس سے پرانے ورژنز کے لیے اب اہم سیکیورٹی اپ ڈیٹس فراہم نہیں کی جائیں گی۔ اس کا مطلب یہ ہے کہ صرف وہی فون محفوظ تصور کیے جا سکتے ہیں جو اینڈرائیڈ 13 یا جدید ورژن پر چل رہے ہیں، اور ایسے ڈیوائسز کی شرح تقریباً 58 فیصد ہے، جبکہ باقی 40 فیصد سے زیادہ فونز سیکیورٹی سپورٹ سے باہر ہو چکے ہیں۔

کمپنی کی رپورٹ کے مطابق دسمبر میں اینڈرائیڈ 16 صرف 7.5 فیصد فونز پر انسٹال تھا، اینڈرائیڈ 15 تقریباً 19.3 فیصد، اینڈرائیڈ 14 تقریباً 17.9 فیصد، اور اینڈرائیڈ 13 تقریباً 13.9 فیصد فونز پر استعمال ہو رہا تھا۔ یہی چاروں ورژن اس وقت سیکیورٹی اپ ڈیٹس حاصل کر رہے ہیں۔

ماہرین کے مطابق ایک ارب سے زائد صارفین ایسے فون استعمال کر رہے ہیں جنہیں نئے سیکیورٹی پیچز دستیاب نہیں، جس کی وجہ سے وہ سائبر خطرات کا زیادہ شکار ہو سکتے ہیں۔

دوسری جانب ایپل کو بھی اپنے صارفین کو iOS 26 پر منتقل کرنے میں مشکلات کا سامنا ہے، تاہم توقع ہے کہ آئندہ مہینوں میں زیادہ تر آئی فونز اپ ڈیٹ ہو جائیں گے، جبکہ مکمل طور پر سپورٹ سے باہر آئی فونز کی تعداد کم ہے۔

ماہرین نے صارفین کو مشورہ دیا ہے کہ اگر کوئی فون اینڈرائیڈ 13 یا اس سے جدید ورژن پر اپ ڈیٹ نہیں ہو سکتا، تو بہتر سیکیورٹی کے لیے نیا ڈیوائس لینے پر غور کرنا چاہیے۔